Қилмишидан пушаймон бўлганлар афв этилди
Давлатимиз раҳбарининг Рамазон ҳайити муносабати билан қабул қилинган “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонига кўра, самарқандлик 48 нафар шахс афв этилди.
Самарқанд вилояти ИИБ маълумотларига кўра, халқимизга хос эзгулик, бағрикенглик, инсонпарварлик, меҳр-оқибат ва кечиримли бўлиш каби олижаноб фазилатларнинг ёрқин ифодаси бўлган мазкур ҳужжат асосида афв этилганларнинг 44 нафар жазони ижро этиш муассасаларида жазо муддатини ўтаётган эди. Уларнинг икки нафари жазодан тўлиқ озод этилди, 37 нафари жазони ўташдан муддатидан илгари шартли озод қилинди, 5 нафар маҳкумнинг жазоси енгилроқ жазо билан алмаштирилди.
Афв этилганларнинг икки нафарини аёллар, 4 нафарини олтмиш ёшдан ошган фуқаролар ташкил этди.
– Фарзанд ва набираларимга ибрат бўлиб, уларга тўғри йўл кўрсатадиган пайтимда гиёҳванд модда ноқонуний савдосига аралашиб, озодлик маҳрум этилганимда қалбим оғрирди, – дейди Нуробод туманида яшовчи Б.Р. – Жазони ўташ жараёнида қилмишимдан афсусландим, пушаймон бўлдим. Уйда, оила бағрида тинч-осойишта яшаш қадрини англадим. Президентимизга минг раҳмат, мени ҳам афв этдилар, жазонинг ўталмай қолган қисмидан шартли озод бўлдим.
Шунингдек, фармонга кўра ички ишлар идоралари пробация бўлинмалари ҳисобида турган 4 нафар шахс жазодан тўлиқ озод қилинди.
Маҳаллий ҳокимликлар, тегишли идоралар томонидан афв этилган шахсларни ижтимоий ҳаётга мослашиб, фойдали меҳнат билан шуғулланиши, соғлом турмуш тарзини йўлга қўйиб, жамиятда муносиб ўрин топиши учун уларга зарур кўмак кўрсатилмоқда.
