Qilmishidan pushaymon bo‘lganlar afv etildi
Davlatimiz rahbarining Ramazon hayiti munosabati bilan qabul qilingan “Jazo muddatini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan bir guruh shaxslarni afv etish to‘g‘risida”gi farmoniga ko‘ra, samarqandlik 48 nafar shaxs afv etildi.
Samarqand viloyati IIB ma’lumotlariga ko‘ra, xalqimizga xos ezgulik, bag‘rikenglik, insonparvarlik, mehr-oqibat va kechirimli bo‘lish kabi olijanob fazilatlarning yorqin ifodasi bo‘lgan mazkur hujjat asosida afv etilganlarning 44 nafar jazoni ijro etish muassasalarida jazo muddatini o‘tayotgan edi. Ularning ikki nafari jazodan to‘liq ozod etildi, 37 nafari jazoni o‘tashdan muddatidan ilgari shartli ozod qilindi, 5 nafar mahkumning jazosi yengilroq jazo bilan almashtirildi.
Afv etilganlarning ikki nafarini ayollar, 4 nafarini oltmish yoshdan oshgan fuqarolar tashkil etdi.
– Farzand va nabiralarimga ibrat bo‘lib, ularga to‘g‘ri yo‘l ko‘rsatadigan paytimda giyohvand modda noqonuniy savdosiga aralashib, ozodlik mahrum etilganimda qalbim og‘rirdi, – deydi Nurobod tumanida yashovchi B.R. – Jazoni o‘tash jarayonida qilmishimdan afsuslandim, pushaymon bo‘ldim. Uyda, oila bag‘rida tinch-osoyishta yashash qadrini angladim. Prezidentimizga ming rahmat, meni ham afv etdilar, jazoning o‘talmay qolgan qismidan shartli ozod bo‘ldim.
Shuningdek, farmonga ko‘ra ichki ishlar idoralari probatsiya bo‘linmalari hisobida turgan 4 nafar shaxs jazodan to‘liq ozod qilindi.
Mahalliy hokimliklar, tegishli idoralar tomonidan afv etilgan shaxslarni ijtimoiy hayotga moslashib, foydali mehnat bilan shug‘ullanishi, sog‘lom turmush tarzini yo‘lga qo‘yib, jamiyatda munosib o‘rin topishi uchun ularga zarur ko‘mak ko‘rsatilmoqda.
