Қишки таътил кунларида мактаб кутубхоналари, компьютер синфлари, “Баркамол авлод” болалар мактаблари хизматда бўлади
Азиз ватандошлар, қадрли устоз ва мураббийлар, ўқувчи-ёшлар!
Барчангизга Янги 2021 йил муборак бўлсин! Янги йил она Ватанимиз равнақи, тинчлиги ва осойишталиги, халқимизнинг фаровон яшашида баракали ва энг хайрли йил бўлишини тилаймиз!
Ҳар биримизнинг хонадонимиздан тинчлик-хотиржамлик аримасин! Фарзанду набиралар бахту камолини кўриш барча ота-она, бобо ва бувиларга насиб этсин!
Қадрли педагоглар, азиз устозлар!
Яқиндагина Президентимизнинг Олий Мажлисга Мурожаатномасини бевосита тинглаб, ўқиб гувоҳи бўлдикки, Сизу бизнинг зиммамизга янада улкан вазифалар юкланди. Албатта, бу имконият ва ғамхўрликларнинг янада ортаётгани, ўз навбатида, халқ таълими соҳасида бевосита биз ижросини таъминлашимиз зарур бўлган вазифалар билан боғлиқ. Шундай экан, Янги йил остонасида доимо изланиб, ўқувчини ўзимизнинг дилбандларимиз, қоракўзларимиз деб, чин юракдан қабул қилиб, мукаммал билим бермоқликни олдимизга мақсад қилайлик. Халқ умиди ва ишончини ҳис этиб, илдам ҳаракат қилайлик. Фанда, таълимда қандай фойдали тажриба ва ноанъанавий ёндашувлар бўлса, ўқувчимизнинг пухта билим олиши учун фаолиятимизга татбиқ этайлик.
Меҳрибон ота-оналар!
Юртбошимиз Сиз азизларга таълим-тарбия ривожининг бешинчи устуни деб таъриф берди ва бунда улкан мақсад ва ишонч бор! Аввало, Сиз фарзандингизни таълим олишга тайёрлаб беришингиз лозим. Оилавий муҳит, боланинг уйдаги бўш вақтининг назорати, мактабда нимани ўрганиб, нимани яхши ўзлаштира олмаётганига эътибор қаратишингиз, бу борада ўқитувчиларимиз билан доимий ҳамкорлигингиз жуда муҳим.
Азиз ўқувчилар, ўғил-қизларимиз!
Янги йилда олдингизга улкан ва эзгу мақсадлар қўйинг. Албатта, бу мақсадларга эришиш учун ўқиш ва изланишдан асло тўхтаманг. Чунки орзуларнинг рўёби, энг аввало, илмдир. Орзу-умидларингизга эришиш учун мўжиза содир бўлишини асло кутманг.
2021 йилга “Ёшларни қўллаб-қувватлаш ва аҳоли саломатлигини мустаҳкамлаш йили” деб ном берилди. Бу Сиз учун янада кенг имкониятлар яратилади, дегани.
Қишки таътил кунларида ҳам Сиз учун мактабингиз кутубхонаси, компьютер синфхоналари, “Баркамол авлод” болалар мактаблари эшиги доимо очиқ! Китобхонлигингиз, билимингизни синаш учун ўтказиладиган онлайн танловларда ҳам фаол иштирок этинг! Буларнинг бари, Сизнинг бўш вақтингиз ҳар томонлама фойдали ўтиши учун жорий этилган.
Яна бир бор Янги йил байрами билан барчангизни самимий муборакбод этиб, эл-юрт равнақи, халқимиз фаровонлиги, ёшларимизнинг орзу-умидларини рўёбга чиқаришдаги хайрли ишларингизга муваффақият тилайман! Мустаҳкам соғлик, хотиржамлик доимо ҳамроҳингиз бўлсин!
Зебинисо ШОДИЕВА,
Самарқанд вилояти Халқ таълими бошқармаси бошлиғи.
