Qishki ta’til kunlarida maktab kutubxonalari, kompyuter sinflari, “Barkamol avlod” bolalar maktablari xizmatda bo‘ladi
Aziz vatandoshlar, qadrli ustoz va murabbiylar, o‘quvchi-yoshlar!
Barchangizga Yangi 2021 yil muborak bo‘lsin! Yangi yil ona Vatanimiz ravnaqi, tinchligi va osoyishtaligi, xalqimizning farovon yashashida barakali va eng xayrli yil bo‘lishini tilaymiz!
Har birimizning xonadonimizdan tinchlik-xotirjamlik arimasin! Farzandu nabiralar baxtu kamolini ko‘rish barcha ota-ona, bobo va buvilarga nasib etsin!
Qadrli pedagoglar, aziz ustozlar!
Yaqindagina Prezidentimizning Oliy Majlisga Murojaatnomasini bevosita tinglab, o‘qib guvohi bo‘ldikki, Sizu bizning zimmamizga yanada ulkan vazifalar yuklandi. Albatta, bu imkoniyat va g‘amxo‘rliklarning yanada ortayotgani, o‘z navbatida, xalq ta’limi sohasida bevosita biz ijrosini ta’minlashimiz zarur bo‘lgan vazifalar bilan bog‘liq. Shunday ekan, Yangi yil ostonasida doimo izlanib, o‘quvchini o‘zimizning dilbandlarimiz, qorako‘zlarimiz deb, chin yurakdan qabul qilib, mukammal bilim bermoqlikni oldimizga maqsad qilaylik. Xalq umidi va ishonchini his etib, ildam harakat qilaylik. Fanda, ta’limda qanday foydali tajriba va noan’anaviy yondashuvlar bo‘lsa, o‘quvchimizning puxta bilim olishi uchun faoliyatimizga tatbiq etaylik.
Mehribon ota-onalar!
Yurtboshimiz Siz azizlarga ta’lim-tarbiya rivojining beshinchi ustuni deb ta’rif berdi va bunda ulkan maqsad va ishonch bor! Avvalo, Siz farzandingizni ta’lim olishga tayyorlab berishingiz lozim. Oilaviy muhit, bolaning uydagi bo‘sh vaqtining nazorati, maktabda nimani o‘rganib, nimani yaxshi o‘zlashtira olmayotganiga e’tibor qaratishingiz, bu borada o‘qituvchilarimiz bilan doimiy hamkorligingiz juda muhim.
Aziz o‘quvchilar, o‘g‘il-qizlarimiz!
Yangi yilda oldingizga ulkan va ezgu maqsadlar qo‘ying. Albatta, bu maqsadlarga erishish uchun o‘qish va izlanishdan aslo to‘xtamang. Chunki orzularning ro‘yobi, eng avvalo, ilmdir. Orzu-umidlaringizga erishish uchun mo‘jiza sodir bo‘lishini aslo kutmang.
2021 yilga “Yoshlarni qo‘llab-quvvatlash va aholi salomatligini mustahkamlash yili” deb nom berildi. Bu Siz uchun yanada keng imkoniyatlar yaratiladi, degani.
Qishki ta’til kunlarida ham Siz uchun maktabingiz kutubxonasi, kompyuter sinfxonalari, “Barkamol avlod” bolalar maktablari eshigi doimo ochiq! Kitobxonligingiz, bilimingizni sinash uchun o‘tkaziladigan onlayn tanlovlarda ham faol ishtirok eting! Bularning bari, Sizning bo‘sh vaqtingiz har tomonlama foydali o‘tishi uchun joriy etilgan.
Yana bir bor Yangi yil bayrami bilan barchangizni samimiy muborakbod etib, el-yurt ravnaqi, xalqimiz farovonligi, yoshlarimizning orzu-umidlarini ro‘yobga chiqarishdagi xayrli ishlaringizga muvaffaqiyat tilayman! Mustahkam sog‘lik, xotirjamlik doimo hamrohingiz bo‘lsin!
Zebiniso ShODIYeVA,
Samarqand viloyati Xalq ta’limi boshqarmasi boshlig‘i.
