Respublikamizning yosh olim, talaba va magistrlari Samarqandda yig‘ildi
Samarqand davlat universitetida Mirzo Ulug‘bek tavalludining 625 yilligi munosabati bilan “Mirzo Ulug‘bek ilmiy merosining zamonaviy astronomiya fani va ta’lim ravnaqidagi roli” mavzusida respublika yosh olim, talaba va magistrlarning 9 ilmiy-amaliy anjumani o‘tkazildi.
Tadbirda Samarqand davlat universiteti rektori R.Xolmurodov, O‘zbekiston Fanlar Akademiyasi Astronomiya instituti direktori, akademik Sh.Egamberdiyev falakiyot ilmining sultoni jahon ilm-faniga qo‘shgan hissasi, astronomiya fanidagi ulkan kashfiyotlari, avlodlarga qoldirgan bebaho merosi xususida so‘z yuritishdi.
– O‘zbekiston Fanlar Akademiyasi Mirzo Ulug‘bekning astronomiya fanidagi betakror tadqiqotlarini o‘rganish, yoshlar o‘rtasida targ‘ib qilishga alohida e’tibor qaratib kelmoqda, – deydi Sh.Egamberdiyev. – Xususan, Samarqand, Andijon davlat universitetlari, O‘zbekiston Milliy universiteti kabi ta’lim muassasalarida o‘quv-ilmiy rasadxonalar tashkil qilindi va ular zamonaviy teleskoplar bilan jihozlandi. Shuningdek, har yili respublika oliy ta’lim muassasalarida ta’lim olayotgan iqtidorli talabalar va yosh olimlar uchun ilmiy konferensiya va seminar-treninglar o‘tkazib kelinmoqda. Joriy yilda buyuk bobomiz yashagan, ishlagan, madrasa va rasadxona qurgan Samarqandda tashkil etilishi ham ishtirokchilarning amaliy tajribasini oshirishga xizmat qiladi.
Ikki kun davom etadigan anjuman doirasida talaba va yosh olimlar Samarqand davlat universiteti “Astronomiya ilmiy-o‘quv markazi”dagi optik ko‘zgusining diametri 48 santimetr bo‘lgan Grabb-Parsons teleskopida osmon jismlarini kuzatadi, olingan tasvirlarni tahlil qiladi va dunyoning boshqa rasadxonalaridagi natijalar bilan taqqoslaydi. Shuningdek, Samarqand shahrining tarixiy obidalari va diqqatga sazovor joylarini tomosha qilishadi.
