Самарқанд олимлари иштирокида Жиззахда қадимий устахона топилди

Самарқанд археология институти олимлари Жиззах вилояти Ғаллаорол тумани Ўгат қишлоғи ва Фориш тумани Нарвон қишлоғида палеолит даврига оид устахона топишди.

Дастлабки топилмажой Ғаллаорол тумани Ўгат қишлоғининг шимолий-шарқий ҳудудида аниқланган бўлиб, 200 га яқин тош буюмлар йиғиб олинган.

Археология институти катта илмий ходими, тадқиқотчи Азбиддин Холматовга кўра, меҳнат қуроллар қумтош (песчаник) ва кварс хомашёсидан ясалган. Тош қуроллар асосан бирламчи ишлов берилган бўлиб, тишсимон қуроллар камчиликни ташкил қилади.

Тўпламда нукеус, пластина, отшеп ва леваллуа типидаги қуролларни учратамиз.

Иккинчи топилмажой Фориш туманидан топилган бўлиб, Нарвон қишлоғининг шимолий-шарқий ҳудудида жойлашган. Бу ердаги тош қуроллар қумтошли(песчаник) бўлиб, 20 га яқин. Улар орасида нуклеус ва отшеп каби меҳнат қуроллари мавжуд.

Ҳар иккала топилма техник-типологик белгиларга кўра, ўрта палеолит билан даврлаштирилди. Тадқиқот ишлари давом эттирилмоқда.