Самарқанд тез тиббий ёрдам тизимига 30 та “Ford” русумидаги реанимобиллар топширилди
2016 йилда вилоятимизда фаолият юритаётган тез тиббий ёрдам тизими бор йўғи 2 та реанимобил хизматидан фойдаланган бўлса, бугунга келиб, тизимда олиб борилаётган ислоҳотлар натижасида 62 та шундай автотранспорт аҳолига тез тиббий хизмат кўрсатмоқда.
Бугун вилоятимизда фаолият юритаётган тез тиббий ёрдам станцияларига 30 та “Ford” русумидаги энг замонавий реанимобиллар топширилди. Бу ҳақда вилоят соғлиқни сақлаш бошқармаси ахборот хизмати маълум қилди.
Реанимобилларни топшириш маросимида сўзга чиққан вилоят ҳокимининг ўринбосари Хуршид Очилов ва вилоят соғлиқни сақлаш бошқармаси бошлиғи Давронбек Жуманиёзовлар кейинги йилларда аҳолига кўрсатилаётган тиббий хизмат сифатини яхшилаш мақсадида тез тиббий ёрдам хизматига ажратилаётган маблағлар бир неча баробарга оширилганини ва тез ёрдам бригадалари дислокацияси қайта кўриб чиқилиб, қишлоқ оилавий поликлиникаларида янги тез тиббий ёрдам таянч пунктлари ташкил этилганлигини таъкидлашди. Бунинг натижасида тез ёрдам бригадаларининг хизмат кўрсатиш радиуси 15-20 километрдан 8-12 километргача қисқаргани ҳудудлар аҳолиси учун ҳам, соҳа ҳодимлари учун қулайликлар яратгани қувонарлидир.
Энг муҳими, тизимда фаолият олиб бораётган тиббиёт ходимларининг моддий манфаатдорлиги ошиб, уларнинг олис ҳудудларда фаолият олиб боришлари учун қўшимча имкониятлар яратилди.
