Самарқандда Рудакий ҳайкали очилди
Ватанимиз мустақиллигининг 31 йиллиги кенг нишонланаётган шу кунларда Самарқанд шаҳрида форс-тожик адабиётининг асосчиси Абу Абдуллоҳ Рудакий ҳайкалининг тантанали очилиш маросими ўтказилди.
Самарқанд шаҳрида турли йилларда бу улуғ адибнинг кичик ҳайкал ва бюстлари бўлган, аммо улар ҳар хил сабаблар билан бошқа жойга кўчирилган ёки ўз муносиб ўрнини топмаган. Ваҳоланки, шаҳарда Рудакий номи билан аталадиган катта кўча бор, шунингдек, яна бошқа бир қатор объектларга шоир номи берилган.
– Кейинги икки йилда шаҳримизнинг Рудакий номли кўчаси реконструкция қилиниб, кенгайтирилди, ҳудудда катта ҳажмдаги қурилиш-ободонлаштириш ишлари амалга оширилди, – деди ёдгорликнинг очилиш маросимида иштирок этган Самарқанд вилояти ҳокими Э.Турдимов. – Шу кўчанинг Бўстонсарой кўчаси билан кесишган чорраҳасида замонавий йўл ўтказгич қурилди. Йўл атрофи обод ва кўркам кўриниш олди. Бу жараёнда вилоят тожик ва тожикзабонлар миллий маданий маркази, вилоятимиз жамоатчилиги ва ижодкорлар ушбу кўча атрофида Абу Абдуллоҳ Рудакий хотира майдони ташкил этиш ва ҳайкалини ўрнатиш ташаббусини билдирди. Бу ташаббус вилоят ва шаҳар ҳокимлиги томонидан қўллаб-қувватланиб, шу жой танланди ва обод қилинди. Таниқли ҳайлактарош Туркман Эсонов томонидан улуғ адибнинг салобатли ҳайкали яратилди.
Маросимда таниқли шоир ва ёзувчилар, олимлар, вилоят ва шаҳар жамоатчилиги вакиллари сўзга чиқиб, бу эзгу иш ташаббускорларига миннатдорлик билдирди.
– Бу кўркам майдоннинг ташкил этилиши мамлакатимизда миллатлараро муносабатларни мустаҳкамлаш борасида амалга оширилаётган ишларнинг яна бир кўриниши, - дейди “Овози Самарқанд” газетаси муҳаррири Баҳодир Раҳмонов. - Абу Абдуллоҳ Рудакий ёзиб қолдирган нодир асарлар минг йиллик тарихга эга бўлса-да, бугун ҳам ўз аҳамиятини йўқотмаган. Унинг ғазал ва рубоийларидаги ватанни севиш, тинчликнинг қадрига етишга ундовчи ғоялар ёшлар тарбиясида муҳим ўрин тутади. Шунинг учун ҳам биз вилоят ҳокимлиги кўмагида улуғ адибнинг энг сара рубоийларидан иборат китоб таййёрлаб, ўзбек ва тожик тилларида чоп этдик.
Мазкур мажмуанинг яратилиши азалдан яқин қўшни, қардош бўлган ўзбек ва тожик халқлари ўртасидаги дўстлик алоқаларини мустаҳкамлаш, икки халқ ижодкорларининг ҳамкорлигини янада кучайтиришга хизмат қилиши таъкидланди.
Тўлқин СИДДИҚОВ.
