Самарқандни гулга буркайлик - 1+10!
Муборак Рамазон ҳайити арафаси ва байрам кунлари Пахтачи туманида "Самарқандни гулга буркайлик - 1+10!” акцияси ва “Ҳар бир ўқувчининг ўз гули бўлсин!” ёш гулсеварлар ҳаракати доирасида кенг кўламли “яшил” тадбирлар ташкил этилди.
Акциянинг асосий мақсади – ёш авлод қалбида Ватанга муҳаббат, табиатга эҳтиром ва меҳрни уйғотиш, уларни меҳнатсеварлик руҳида тарбиялаш, таълим муассасалари ва яшаш ҳудудларини обод ва кўкаламзор қилишдир.
Тадбирлар доирасида тумандаги мактабгача таълим ва мактаб таълими муассасаларига маърифатпарвар шоир Ориф Гулханий уй-музейи боғида етиштирилган 32 мингдан зиёд гул кўчатлари, турли манзарали ўсимликлар ва уларнинг уруғларисовға тариқасида тақдим этилди. Шунингдек, ММТ бўлими кутубхонаси учун Гулханийлар сулоласи ҳаёти ва ижодига бағишланган беш дона китоб совға қилинди.
Қайд этиш лозимки, 2022 йилда ҳам шу каби эзгу ташаббус доирасида 42 мингдан ортиқ ўсимлик ва уруғлар ҳамда мактаб кутубхоналари учун китоблар таълим муассасаларига етказилган эди.
Қувонарлиси, бугунги кунгача ўқувчи-ёшлар ва болажонлар уларни меҳр ва эҳтиёткорлик билан парвариш қилиб, атроф муҳит ободлигига муносиб ҳисса қўшмоқда, китобларни эса қизиқиш билан мутолаа қилмоқда.
