Samarqandni gulga burkaylik - 1+10!
Muborak Ramazon hayiti arafasi va bayram kunlari Paxtachi tumanida "Samarqandni gulga burkaylik - 1+10!” aksiyasi va “Har bir o‘quvchining o‘z guli bo‘lsin!” yosh gulsevarlar harakati doirasida keng ko‘lamli “yashil” tadbirlar tashkil etildi.
Aksiyaning asosiy maqsadi – yosh avlod qalbida Vatanga muhabbat, tabiatga ehtirom va mehrni uyg‘otish, ularni mehnatsevarlik ruhida tarbiyalash, ta’lim muassasalari va yashash hududlarini obod va ko‘kalamzor qilishdir.
Tadbirlar doirasida tumandagi maktabgacha ta’lim va maktab ta’limi muassasalariga ma’rifatparvar shoir Orif Gulxaniy uy-muzeyi bog‘ida yetishtirilgan 32 mingdan ziyod gul ko‘chatlari, turli manzarali o‘simliklar va ularning urug‘larisovg‘a tariqasida taqdim etildi. Shuningdek, MMT bo‘limi kutubxonasi uchun Gulxaniylar sulolasi hayoti va ijodiga bag‘ishlangan besh dona kitob sovg‘a qilindi.
Qayd etish lozimki, 2022 yilda ham shu kabi ezgu tashabbus doirasida 42 mingdan ortiq o‘simlik va urug‘lar hamda maktab kutubxonalari uchun kitoblar ta’lim muassasalariga yetkazilgan edi.
Quvonarlisi, bugungi kungacha o‘quvchi-yoshlar va bolajonlar ularni mehr va ehtiyotkorlik bilan parvarish qilib, atrof muhit obodligiga munosib hissa qo‘shmoqda, kitoblarni esa qiziqish bilan mutolaa qilmoqda.
