Спортчи бола - ота-она ғурури
Кеча Ўзбек жанг санъати федерацияси вилоят бўлими уюштирган мусобақада иштирок этиб, ана шу фикрга келдим.
Спортчи болалардан кўра уларнинг ота-оналари, танишларининг кўпчилиги менда ана шу фикрни пайдо қилди. Зеро, кичкинтойларнинг ҳар бир чиқишини олқишлар билан қўллаб-қувватлаш жараёнга ўзгача шукуҳ бағишлади.
Спортнинг ўзбек жанг санъати тури кундан-кунга ривожланиб бормоқда. Эсимда, бу спорт турининг жорий этилиши 2009 йилдан бошланган эди. Таниқли курашчи Ҳалим Юсупов бош мураббий, камина эса федерациясга фахрий раис этиб тайинланган эдим. Ўшанда 1 йил давомида бор-йўғи 150 нафар боланинг бу спорт тури билан шуғулланишини ташкил этганмиз, холос.
15 йил ичида вазият қувонарли даражада ўзгарди. Бугун вилоят бўйича 3 ярим минг йигит-қиз ўзбек жанг санъати билан шуғулланмоқда. Ҳатто болалар боғчаларида унинг ихчам, осон усуллари бўйича кичик мусобақалар ўтказилмоқда. Шу кураш турига ихтисослашган 15 га яқин жамоа пайдо бўлди.
Самарқанд якка кураш спорт турига ихтисослашган спорт мактабида йил якуни муносабати билан ўтказилган вилоят очиқ биринчилигида айнан ана шу ютуқлар қайд этиб ўтилди. Унда 200 нафар болалар ва ўсмирлар иштирок этди. Дарвоқе, бу мусобақада 50 нафарга яқин қизлар ҳам беллашдилар.
Тадбир аввалида федерация ижрочи директори Ҳ.Юсупов ўз ҳудудларида фидойилик кўрсатган мураббийларга, энг кўп ютуққа эришган спортчиларга фахрий ёрлиқ ва совғалар топширди.
Бинобарин, шу йилнинг 2 март ойида федерация спортчилари Осиё ва жаҳон кубоги мусобақаларида иштирок этиб, 13 та олтин, 10 та кумуш, 21 та бронза медалларига эга бўлдилар. Республика мусобақаларида эса 6 марта иштирок этиб, жами 27 та олтин, 22 та кумуш ва 43 та бронза медаллари қўлга киритилди. Вилоят миқёсида 4 маротаба очиқ биринчиликлар уюштирилди.
Болажонларнинг қувончини, ота-оналар ҳаяжонини кўриб, ҳавасим келди. Демак, спорт нафақат саломатлик манбаи, балки у бизнинг маънавиятимизни ҳам юксалтиришга хизмат қилмоқда. Йигит-қизларнинг сафда чиройли туриши, жангдан сўнг бир-бирига қилган муносабати, томошабинларнинг беэътибор бўлмаслиги, айниқса, давлат мадҳияси янграганда бараварига жўр бўлиши ана шундан далолатдир.
Ишонч комилки, ўзбек жанг санъати ҳар бир оилага кириб боради ва ҳар бир ўғил-қизнинг соғлом, мард, маънавиятли бўлишига хизмат қилади.
Фармон ТОШЕВ.
