@zarafshonbot‘га билдиришларича: Турдимовга яна мурожаат қилишим керакми?
Мен 1972 йилда туғилганман. 4 нафар фарзандим бор, ўзим уй бекасиман, иккинчи гуруҳ ногирониман. Турмуш ўртоғим ҳам бир йилдан буён вақтинча ишсиз.
2020 йил 17 февраль куни Челак шаҳридаги 1-БЎСМда вилоят ҳокими Эркинжон Турдимовнинг сайёр қабулига бордим. Мақсадим тос чурраси емирилиши, артритдан соғайиш эди.
Вилоят ҳокимига дардимни айтганимда, шу ерда турган кишилар гапларимни ёзиб олишди ва операция учун пул ўтказиш кераклигини айтишди. Кейин Э.Турдимов вилоят травматология шифохонасидан Ойбек исмли кишини чақириб, “операция учун пул ўтказилади, операцияни гаплаш”, деди.
Шундан кейин менга жуда кўп телефон қилиб, сизга пул ўтказилди, дейишди. Шу гапга ишониб, вилоят травматология касалхонасига бордим. 16 кун даволандим, лекин операция учун пул ўтказишмади, деб жавоб беришди. Келганимдан кейин яна телефон бўлди - чамаси 10 март атрофида эди. Телефонда яна менинг операциямга пул ўтганини билдиришди. Кейин операция учун борсам, пул ўтмаган, дейишмоқда. 27 июль куни яна травматологияга борсам, яна шу жавоб...
Қаердадир менинг фамилиям рўйхатдан тушиб қолганми? Шунча одамнинг ичидан менинг фамилиям қолиб кетганлигини тушунмайман. Энди мен нима қилишим керак? Белингизни операция қилдирсангиз, яхши бўлиб кетасиз, қилишмаса, ногирон бўлиб ётоқда қолиб кетасиз, дейишаяпти. Яна Эркинжон Турдимовга мурожаат қилишим керакми?
Раҳима МУҲАММАДИЕВА,
Пайариқ тумани Алишер Навоий маҳалласи.
