Qonunchilikdagi o‘zgarishlar saylov kampaniyasini o‘tkazish uchun sarflanadigan xarajatlarni 30 milliard so‘mga qisqartirishi mumkin
Samarqand shahridagi yoshlar markazida “O‘zbekiston Respublikasining ayrim qonun hujjatlariga saylov va referendum o‘tkazish tartibini yanada takomillashtirishga qaratilgan o‘zgartirish va qo‘shimchalar kiritish to‘g‘risida”gi Konstitutsiyaviy qonun loyihasi maqsad-mazmuniga bag‘ishlangan seminar o‘tkazildi.
Viloyatimizning turli hududlaridan kelgan yoshlar ishtirok etgan tadbirda Markaziy saylov komissiyasi kotibi Xudoyor Mamatov, Qonunchilik palatasi deputatlari Navro‘z Rizayev, G‘ayrat Abdiyevlar qonun loyihasining mazmuni, unda belgilangan yangiliklarning ijtimoiy, siyosiy ahamiyati haqida so‘z yuritdi.
Ta’kidlanganidek, jamiyat hayotida siyosiy partiyalarning rolini hamda fuqarolarning siyosiy faolligini oshirish demokratik islohotlarning muhim bosqichi hisoblanadi. Saylovda aralash (majoritar, proporsional) saylov tizimini joriy etish va shu orqali Oliy Majlis Qonunchilik palatasi deputatlari saylovini yangi tartib asosida o‘tkazish jarayonni yanada jadallashtiradi. Ya’ni, bu bilan siyosiy partiyalarning saylovchilar oldidagi mas’uliyati kamida ikki hissa ortadi, saylovchilar faqat partiyalar tomonidan ko‘rsatilgan shaxslarga emas, balki partiyaning o‘ziga, dasturiga ham ovoz beradi.
— Qonun loyihasida saylov komissiyalari tuzilishi, faoliyat tartibini takomillashtirish ham nazarda tutilgan, - deydi Xudoyor Mamatov. – Hisob-kitoblarga ko‘ra, tizimdagi bu islohotlar saylov kampaniyasini o‘tkazish uchun sarflanadigan xarajatlarni 30 milliard so‘mga qisqartirish imkonini beradi. Shuningdek, unda yoshlar, xotin-qizlarning deputat sifatida saylanishi uchun teng imkoniyatlar yaratish, jarayonda qonun va adolat ustuvorligini ta’minlash masalasiga alohida e’tibor qaratilgan. Bir so‘z bilan aytganda, qonun loyihasi milliy saylov tizimimizda muhim siyosiy burilish yaratadi. Biz shu kabi seminarlar orqali uning ahamiyatini jamiyatimizning eng faol qatlami – yoshlarga tushuntirishga harakat qilyapmiz.
