Андроид қурилмалар учун Zarnews.uz мобил иловаси. Юклаб олиш x

Cохта акцияларни пуллаб, молиявий пирамида ташкил этган шахсларга жиноят иши қўзғатилди

Бош прокуратура ҳузуридаги Департаментнинг Қашқадарё вилояти бошқармаси бир нечта фуқаролар мурожаатига асосан терговга қадар текширув ўтказди.

Унда Т.Р. ва бошқалар ўзларини гўёки, “N.” хорижий компаниясининг Қашқадарё вилоятидаги расмий вакили сифатида таништириб, 17 та хорижий компаниянинг сохта акцияларини сотиш эвазига 2 минг нафарга яқин фуқародан жами 9 миллион АҚШ доллари йиғиб олишган.

Шунингдек, янада кўпроқ пул маблағ жалб этиш ҳамда мижозлар сонини орттириш мақсадида йиғилган 9 миллион АҚШ долларидан 800 минг АҚШ долларини одамларга фоиз ҳисобида беришган.

Бундан ташқари, Т.Р. ўзига 78 минг АҚШ долларига “Volkswagen”, ўғли А.Н. номига 2 та “Ласетти” русумли автомашинасини ва Қарши шаҳридаги савдо дўконини сотиб олиб, жиноий фаолиятдан олган даромадларни легаллаштирган.

Бош прокуратура матбуот хизмати хабарига кўра, мазкур ҳолат юзасидан Т.Р. ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.