Андроид қурилмалар учун Zarnews.uz мобил иловаси. Юклаб олиш x

Кам таъминланган оилаларга парранда тарқатилди

Самарқанд вилоят прокуратураси ташаббуси билан Қўшработ туманидаги Катта Оқмачит ҳамда Чиммос маҳаллаларида хонадонларда парранда боқиш ва иссиқхона ташкил этиш тажрибаларини кенг тарғиб этишга бағишланган кўргазмали семинар бўлиб ўтди.

Катта Оқмачит маҳалласида ташкил этилган тадбир 2 минг бош парранда боқаётган Ўктам Холбоев хонадонида, Чиммос маҳалласидаги семинар эса томорқасининг 2 сотих майдонида иссиқхона ташкил этган Тўлқин Турдимов хонадонида ўтказилди. Унда прокуратура ходимлари ва мутахассислар томорқа имкониятларидан самарали фойдаланиш, камбағалликдан чиқиш, рўзғорни ўз меҳнати, ҳаракати билан тўкис тебратиш ҳақида сўз юритди, бу борада зарур тушунчалар, таклифлар берди.

- Халқимизда “Қўлдан берганга қуш тўймас”, деган нақл бор, - дейди вилоят прокурори Фарҳод Зуфаров. – Хитойликлар эса “Дўстингни бир марта тўйдирмоқчи бўлсанг, балиқ бер. Дўстим доим тўқ юрсин, десанг, қармоқ бер”, дейди. Шу жиҳатдан одамларга миллион сўмдан беришдан кўра миллионларни ишлаб топишга ўргатган яхши. Ушбу семинар ҳам айнан шу мақсадда ташкил этилди. Унда меҳнат қилишга имконияти бор оилаларга бепул парранда тарқатиш, ихчам иссиқхона қурилишига кўмаклашиш ва кўчат билан таъминлаш орқали уларни меҳнат қилиш орқали даромадга эга бўлишларига эришишдан иборат. Бу ташаббус вилоятимиз бўйича кенг қулоч ёйди ва камбағал оилаларга кўмаклашиш мақсадида туман-шаҳарларидаги прокурор секторларидаги 447 нафар прокуратура, прокуратура ҳузуридаги департамент ва МИБ ходимларига 606 та камбағал оила бириктириб берилди.

Шу куни вилоят прокурори ва мутахассислар Ўртасой маҳалласида яшовчи кам таъминланган оилалар билан ҳам учрашди ва кам таъминланган оилаларга озиқ-овқат маҳсулотлари ҳамда 300 минг сўмлик товуқ ва жўжа тарқатди, уни парвариш қилиш учун тушунча ва таклифларни берди.