Маданий ёдгорликлар ҳудудига юк машиналари киритилмайди, фақат ўзимизнинг сувенир маҳсулотлар сотилади
Самарқанд вилояти ҳокими Э.Турдимов Президентимизнинг 2019 йил 13 августдаги “Ўзбекистон Республикасида туризм соҳасини янада ривожлантириш чора-тадбирлари тўғрисида”ги фармони ижросини таъминлашга доир қарор қабул қилди.
Унга кўра, 2020 йил 1 январдан:
- вилоят ҳудудида тадбиркорлик субъектларининг чет эл таомларига ёки алоҳида йўналишга ихтисослаштирилган мавзули овқатланиш шохобчаларини, шунингдек, “караоке” заллари ва туристик кўнгилочар муассасаларини ташкил этиш харажатларининг бир қисми Туризмни ривожлантириш давлат қўмитаси ҳузуридаги бюджетдан ташқари Туризм соҳасини қўллаб-қувватлаш жамғармаси маблағлари ҳисобидан, ҳар бир лойиҳа учун 10 миллион сўм миқдорида қопланиши;
- вилоятда Вазирлар Маҳкамаси томонидан тасдиқланадиган рўйхат бўйича моддий-маданий мерос объектлари ҳудудларига 5 тоннадан ортиқ вазнга эга катта ҳажмли автотранспорт воситаларининг киришига чеклов қўйилиши;
- ЮНЕСКО Умумжаҳон мероси объектлари рўйхатига киритилган маданий мерос объектлари ва давлат муҳофазасига олинган тарихий ёки маданий ёдгорликлар ҳудудида фақат мамлакатимизда ишлаб чиқарилган сувенир маҳсулотлари сотилиши белгиланди.
