Конфет ниқобидаги оғу

Наркожиноятчилик инсоният учун янги глобал хавф-хатарга айланмоқда. Сўнгги салбий тенденцияларга кўра, истеъмоли осон, яшириш ва тарқатиш қулай бўлган синтетик наркотиклар анъанавий наркотиклар ўрнини эгалламоқда.

Уларнинг тарқалиши асосан ёшлар орасида юз беряпти. Синтетик наркотиклар яширин нарколабораторияларда тайёрланиб, интернет орқали контактсиз шаклда ўтказилмоқда, наркотикларни тарқатиш манбаси бўлган уюшган жиноятчилик трансчегаравий хусусият касб этиб бормоқда.

Яқинда Божхона қўмитасининг “Тошкент-АEРО” ихтисослаштирилган божхона комлпекси контрабандага қарши курашиш шуъбаси, “Электрон тижорат” ташқи иқтисодий фаолият божхона пости ходимлари томонидан Давлат хавфсизлик хизмати билан ҳамкорликда аниқланган ҳолатда ҳам наркотик моддаларни трансчегаравий ўтказиш ва яширин нарколаборатория фаолиятига чек қўйилди.

Гап шундаки, Янгийўл туманида истиқомат қилувчи 20 ёшли фуқаро номига Нидерландиядан юборилган халқаро курьерлик жўнатмасида ҳужжатларга кўра, турли конфетлар юборилгани аниқланди. Аммо сиртдан қараганда безиён ва бежирим кўринган бу конфетлар божхона ходимларини шубҳалантирди.

Божхона қўмитасининг Марказий божхона лабораториясида ўтказилган экспертиза шубҳаларни тасдиқлади. Жўнатмадаги конфетлар аслида оғу – 1 кг. 351 гр. “клефедрон” синтетик наркотик моддаси эканлиги аниқланди.

Масаланинг аянчли жиҳати, ўз номига жўнатма юборилган шахс 10 миллион сўм пул эвазига ўзининг номига жўнатма юборилишига, у эса жўнатмани қабул қилиб олиб, бошқа шахсга етказишга рози бўлган.

Тезкор тадбир давомида жўнатмани ушбу шахсдан қабул қилиб олиши керак бўлган 36 ёшли бошқа бир фуқаро ҳам қўлга олинди ва унинг Яшнобод туманидаги хонадони кўздан кечирилди.

Натижада, хонадонда гиёҳвандлик моддаларини тайёрлаш ва тақсимлаш учун яширин нарколаборатория ташкил этилганлиги фош бўлди.

Нарколабораториядан 5,3 кг. оғирликдаги синтетик наркотик моддалар, уларни тайёрлашда фойдаланилган турли колбалар, полиэтилен ўрамлар, миксер, турли кимовий суюқликлар ва бошқа асбоб-ускуналар далилий ашё тариқасида олиб қўйилди.

Ҳолат юзасидан божхона органлари томонидан жиноят иши қўзғатилди.

Эслатиб ўтамиз, республикамз божхоначилари ўтган йилда ва жорий йилда жами 7 та яширин нарколаборатория фаолиятига чек қўйишган.