Андроид қурилмалар учун Zarnews.uz мобил иловаси. Юклаб олиш x

Минскда Лукашенконинг рақибини қўллаган 34 минг киши намойишга чиқди

Беларусь пойтахти Минск шаҳрида кучайтирилган хавфсизлик чоралари остида президентликка номзод Светлана Тихановскаяни қўллаб 34 минг аҳоли иштирокида намойиш бўлиб ўтди. Бу ҳақда РИА Новости хабар берди.

Тадбир 30 июль куни маҳаллий вақт билан соат 18:00 (Тошкент вақти билан 20:00)да “Дружба” боғида бошланди. Одамлар тадбирда иштирок этиш учун навбатда туриб кўрикдан ўтишга мажбур бўлди.

Маълум қилинишича, боғда турли ёш вакиллари йиғилган. Кўпчилик мухолифат партиялар Европа иттифоқи, шунингдек, Беларусь миллий байроқлари билан келган.

Ҳуқуқни муҳофаза қилиш идоралари берган маълумотга кўра, оммавий намойишда 34 мингдан ортиқ одам иштирок этган.

Намойишда президентликка номзод Светлана Тихановскаянинг ўзи ҳам иштирок этди. Унинг турмуш ўртоғи, мухолифатчи ва видео блогер Сергей Тихановский бир муддат илгари ҳибсга олинган эди. Унга нисбатан бир нечта жиной иш қўзғатилган.

Тихановскийнинг ўзи Беларусь президентлигига номзодини қўйишни режалаштирган эди. Бироқ маъмурий ҳибсда бўлганлиги ва ҳужжатларга шахсан ўзи имзо чека олмаганлиги сабабли Марказий сайлов комиссиядан рўйхатдан ўта олмади. Натижада, унинг турмуш ўртоғи Светлана Тихановская президентликка ўз номзодини рўйхатдан ўтказди.

Беларусь президентлиги учун 5 киши кураш олиб бормоқда. Шу жумладан, улар сафида беш марта қайта сайланган, амалдаги президент Александр Лукашенко ҳам бор.

Сайловлар 9 август куни ўтказилиши кутилмоқда.ac