Андроид қурилмалар учун Zarnews.uz мобил иловаси. Юклаб олиш x

Пайариқда бройлер жўжалар ва уларнинг озуқаси бепул тарқатилмоқда

- Бу ташаббусни бежизга қўлламаяпмиз, - дейди туман Маҳалла ва оилани қўллаб-қувватлаш бўлими бошлиғи Дилфуза Мамасолиева. - Паррандачилик билан шуғулланишга жиддий киришган киши кўп вақт ўтмай унинг тухуми ва гўштини саришта қилолмай қолиши ҳаётда кўп исботини топган. Шуларни ҳисобга олган ҳолда туманимиздаги 3477 та камбағал оилани ҳар томонлама қўллаб-қувватлаш борасида аниқ, тизимли ишлар олиб бораяпмиз. Тўртта сектордаги олтита маҳаллада истиқомат қилувчи кам таъминланган оилаларга бройлер жўжалар берилиши режалаштирилди. Бугун бу иш  Бошқўрғон, Дарвишиқ маҳаллаларида бошланган.

Бройлер жўжаларни аҳолига “Челак томорқа хизмати” масъулияти чекланган жамияти етказиб бермоқда. Уларнинг саъй-ҳаракати билан кўплаб оилалар муқим иш билан таъминланаётир.

– Бу ташаббуснинг аҳамиятли томони шундаки, жўжалар ва уларнинг еми бепул, – дейди “Челак томорқа хизмати” МЧЖ раҳбари Умар Омонов.- Олайлик, битта жўжа аҳоли учун 4500 сўмга баҳоланган. Юз дона жўжа олган киши бир ойда 1,2 миллион сўм даромад қилади. Гўштга тайёр бўлган товуқларни ҳам ўзимиз харид қиламиз. Бу дегани ўртада ҳеч ким куйиб қолмайди. Фақат ҳафсала билан ишлаш керак. Ҳозирда аҳолига тўрт минг дона шундай жўжа етказиб бердик.

Бошқўрғонликларнинг саъй-ҳаракати билан бозорларимизда тухум ва парранда гўшти янада сероблашади. Чунки улар туманда биринчилардан бўлиб бройлер жўжани боқишни бошлаб юборишди.

- Аҳолимиз бундай ташаббусдан бениҳоя хурсанд, - дейди маҳалла фуқаролар йиғини раиси Султон Ҳамроев. – Йигирмага яқин оила аъзолари ишли бўлди. Муҳими, бу жўжалар озуқа кам талаб этиб, қилинган сарф-харажат қисқа вақт ичида қопланар экан.

Ҳусниддин ХОЛДОРОВ.