Андроид қурилмалар учун Zarnews.uz мобил иловаси. Юклаб олиш x

Самарқанд вилояти ички ишлар бошқармаси огоҳлантиради!

Коронавирус инфекцияси тарқалишининг олдини олиш мақсадида вилоятимизда, хусусан, Самарқанд шаҳрида ички ишлар органлари ходимлари томонидан ҳар бир кўча, маҳалла, бозорлар, савдо-сотиқ дўконлари, дорихоналар атрофида карантин қоидаларига риоя қилиш ҳамда коронавирус инфекцияси юқишининг олдини олиш борасида нималарга риоя қилиш лозимлиги борасида олиб борилаётган тарғибот ишларига қарамай, афсуски, бу талабларга риоя қилмаётган, ўзи ва ўзгалар ҳаётини хавф остига қўяётган фуқаролар учрамоқда.

Мисол тариқасида, 18 май куни соат 19:00 га қадар вилоят ҳудудида карантин қоидаларини бузганлиги учун 215 нафар фуқарога нисбатан маъмурий баённомалар расмийлаштрилди.

Заруратсиз уйдан чиқманг! Эҳтиёжлар учун бозор, дўкон ёки дорихоналарга чиққанингизда 2 метрлик ижтимоий масофани сақланг!

Ўзингизда касаллик белгиларини сезсангиз зудлик билан тиббиёт ходимларига мурожаат қилинг!

Карантиннинг барча чекловларига қатъий риоя қилинг!

Кўчада бемақсад юрган фуқаролар қонунчиликда белгиланган тартибда жавобгарликка тортиладилар.

Ҳар биримиз халқимиз тинчлиги ва саломатлиги учун масъулмиз.

Ўзбекистон Республикаси Маъмурий жавобгарлик тўғрисидаги кодексининг 54-моддасига (эпидемияларга қарши кураш қоидаларини бузиш) биноан карантинли ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш, фуқароларга базавий ҳисоблаш миқдорининг 20 бараваридан 30 бараваригача, мансабдор шахсларга эса – 30 бараваридан 50 бараваригача миқдорда жарима солишга сабаб бўлади.

Самарқанд вилояти ИИБ ахборот хизмати.