Самарқандга “доставка” қилинган дори манзилига етиб бормади
Бош прокуратура ҳузуридаги Иқтисодий жиноятларга қарши курашиш департаменти вилоят бошқармаси томонидан ўтказилган тезкор тадбирда, Тойлоқ туманида яшовчи фуқаро А.Тиллаев (исм, фамилия ўзгартирилган) Самарқанд шаҳри Фарҳод кўчасида ноқонуний равишда дори воситалари савдоси билан шуғулланаётгани аниқланган.
Аниқланишича, у ижтимоий тармоқлар орқали танишган наманганлик номаълум фуқаролар томонидан “доставка” хизмати орқали етказиб берилган “Соvid-19” касаллигига қарши курашишда фойдаланишга тавсия қилинган 1 қутиси 300 минг сўм (чакана баҳоси) бўлган “Клексан-4000” дори воситасини 900 минг сўмдан сотаётган бўлган.
У 100 қути дорини 90 миллион сўмга сотган вақтда қўлга олинди. Тадбир давомида дори воситалари ашёвий далил сифатида олиниб, ҳолат юзасидан терговга қадар текширув ҳаракатлари олиб борилмоқда.
Мутахассислар дори-дармонларни қўлдан, жумладан, ижтимоий тармоқлар орқали харид қилишни тавсия этмайди. Негаки, ноқонуний сотилаётган дори-дармонлар Ўзбекистонга амалдаги қонунчиликка риоя этилмаган ҳолда, назорат органларининг текширувларисиз олиб ўтилган бўлади. Яъни, сифатсиз дори воситалари махсус жиҳозланган транспорт ўрнига оддий қутилар ва сумкалар, юк машиналари ёки автобус бўлмаларида айланма йўллар билан оддий санитария-гигиена қоидаларига риоя қилинмаган ҳолда ташилади.
Бош прокуратура ҳузуридаги
Иқтисодий жиноятларга қарши курашиш
департаменти вилоят бошқармаси.
