Хўжа Исмоил маҳалласи аҳлининг тинчини бузган хатлардан кимнинг хабари бор?

Пайариқ тумани “Техника мададкоримиз” ММТП ҳудудидаги “Ортиқов Абдулла” фермер хўжалигининг 640-контурида фуқаро Ҳусан Элтоев томонидан 0,06 гектар ер, шундан 160 квадрат метр майдонга қурилган уй-жойдан ноқонуний равишда фойдаланиб келинаётгани ҳолати бўйича бир неча маротаба огоҳлантиришларга қарамасдан бузмасдан келмоқда.

Туман ҳокими имзоси билан фуқаролик ишлари бўйича Пайариқ туманлараро суди раиси номига шу мазмундаги ноқонуний уй-жойни буздириш тўғрисида даъво аризасининг бир нусхаси таҳририятимиз ходими Ҳусан Элтоев қўлига кеча 12 февраль куни келиб тушди. Аслида бу маҳалла ҳудудида унинг номида ҳеч қандай уй-жой бўлмаган. Бугун шу масалани ўрганиш учун ижодий гуруҳимиз билан Пайариқ туманидаги Хўжа Исмоил маҳалласида бўлдик.

Биз бир масаланинг ечимини топиш учун бориб, кўплаб муаммоларга дуч келдик. Маҳалланинг Хўжа Исмоил гузарига кираверишда қўлида худди шу мазмундаги хатлар билан дардини кимга айтишни билмай тўпланиб турган 50 га яқин фуқарони учратдик.

-  Гузаримизда 150 дан зиёд хонадон бўладиган бўлса, ҳар бир хонадонга шу мазмундаги хат келди, - дейди гузар оқсоқоли Раҳим Мамасолиев. – Гузаримиз янги, 2017-2018 йилларда Имом Бухорий халқаро илмий-тадқиқот маркази ва Ҳадис илми мактаби бунёд этилиши ва унинг атрофидаги ободонлаштириш ишлари амалга оширилиши ҳисобига уйларимиз “снос”га тушгач, шу ерга кўчирилганмиз. Ўша вақтда ҳам кўпгина фуқароларнинг уйлари огоҳлантиришсиз бузилиб, 8 ой (палатка) чайлаларда чанг-тўзонда кун кечириб, қийинчиликлар билан бугун яшаб турган уйларни қурганмиз. Бу хонадонлар ҳам туман ҳокимлиги томонидан ноқонуний ҳисобланиб, фуқаролик судига жўнатилган хатнинг бир нусхасини қўлга олган гузаримиз аҳолисининг яна тинчи бузилди. Ҳамма хавотир ва ҳадикда.

Гузар оқсоқолининг гапини тинглаб, аввало, маҳалла раиси, халқ депутатлари туман кенгаши депутати Фароғат Асқарова билан учрашдик.

- Тўғриси, бу хатдан мен ҳам бугун эрталаб хабар топдим, - дейди Ф.Асқарова. – Эндигина шу масалада туман ҳокимлигига мурожаат қилмоқчи бўлиб тургандим. Бундан икки ой аввал ўзини, вилоятдан “землямер” Абдусаид Сатторовман, деб таништирган мутахассис шу уй-жойларни ўрганиб кетганди. У билан бирга гузарни масъул котибимиз бирга айланган. Маҳалла котиби билиши мумкину, аммо у ҳам ҳозир бу ерда эмас. Туман ҳокимлигига кетганди.

Туман ҳокимлиги ер ва уй-жой масалалари бўйича мутасаддилари билан телефон орқали боғланиб, масаланинг ечимини топиш зарурлигини айтганимизда, мутахассислар маҳалла ҳудудига етиб келди. Ўзларини туман ҳокимлиги қурилиш бўлими мутахассислари Улуғбек Қувватов ҳамда Самандар Ўташев, деб таништирган масъуллар ҳам на хатдан, на аҳолининг тинчи бузилганлигидан хабари борлигини айтди-ю ортига қайтди.

 Шундан сўнг биз туман ҳокимининг ўринбосари Отабек Абдуллаев билан  телефон орқали боғландик. Туман ҳокими имзоси билан чиқарилган бу хатлардан унинг ҳам хабари йўқлигини аниқлик киритиб, қайта биз билан боғланишини айтди.

Бироздан сўнг қўнғироқ қилиб, “Тушунмовчилик бўлган, аслида хатлар ҳар бир хонадонга эмас, ноқонуний қурилган 20-30 тача уй эгалари учун чиқарилиши керак эди. Техник хато туфайли 150 дан ортиқ хат чиқиб кетган, бунинг учун халқдан узр сўраймиз!”, деди.

Ана холос, 150 дан ортиқ хат техник хато туфайли чиқиб кетиб, уларга ҳоким имзо қўядими? Бу техник хатони судга нима деб изоҳлашади энди? Умуман, техник хато сабабини Хўжа Исмоил маҳалласи аҳлига ким, қачон тушунтириб беради?

Тўлқин СИДДИҚОВ.