Булунғурда ўн кунлик келинчакни аёвсиз калтаклаган эр устидан суд ҳукми ўқилди

Бутун Ўзбекистонни шок ҳолатига солган оилавий драма ва ниҳоят мантиқий якунига етди - 24 июль куни ўн кунлик шаръий никоҳдаги жуфти ҳалолини ўласи қилиб калтаклаган эр устидан суд ҳукми ўқилди. Эркакка уч йилу саккиз ойлик қамоқ жазоси берилди, деб хабар қилмоқда Sputnik.

"Ҳукм ўқиладиган куни эркакнинг бирорта қариндоши суд мажлисида қатнашмаган", - дейилган хабарда.

Судья ўз ҳукмини эълон қилганидан сўнг, эркакнинг адвокати келин томондан мижози учун раҳм-шафқат сўраган, аммо келин уни кечирмаган.

Эслатиб ўтамиз, Самарқанд вилояти Булунғур туманида тўйдан 10 кун ўтгач ёш келинчак ўз эри томонидан аёвсиз калтакланган ва туман касалхонасининг реанимация бўлимига тушган эди.

1988 йилда туғилган Зуҳра Умарованинг юзида соғ жой қолмаган, кўзлари даҳшатли шишиб, қонталаш бўлиб кетган эди.

Уни бу ҳолатда ҳатто туққан онаси ҳам танимаган.

Умарованинг онаси ўша вақтда ҳуқуқни муҳофаза қилиш органларига қилган мурожаат бесамар кетган, онага қизини даволатиш ва "ўзига қимматга тушиши боис тиббий экспертизани ўтказмаслик" маслаҳат берилган.