Дунё мамлакатларидаги ғалати қонунлар
Инсоният жамият сифатида шакллангандан бери дунёнинг турли мамлакатларида одамийлик тамойилларига асосланган қонунлар амал қилиб келмоқда. Бироқ айрим юртларда шундай ғалати ва ғайриоддий қонунлар ҳам борки, эшитиб, ишонгинг келмайди.
Масалан, Саудия Арабистонида хотин-қизлар врачлик касбини эгаллаши мумкин эмас. Шу билан бирга, бемор аёлларни эркак врачлар ҳам текшириши ёки даволаши тақиқланган. Натижада, бечора аёллар баъзан касалликка чалинганида ўлимни кутишдан бошқа чора топа олмайдилар. Бу каби қонунлар илгари қабул қилинган бўлса-да, ҳозиргача қатъий амал қилиб келмоқда.
Яна бир қизиқ қонун Американинг Калифорния штатидаги Блайт шаҳрида жорий этилган. Бу ерда ковбой этигини фақат камида икки бош қорамолга эга бўлган одамларгина кийиши мумкин. Агар ковбой этигини кийиб юрганингизни полиция текшириб қолса, маҳаллий ҳокимиятдан икки бош чорва молингиз борлиги ҳақида расмий маълумотни кўрсатишингиз шарт.
Нью-Йорк ва Кентукки штатларида эса яна бир ғалати, ҳатто шафқатсиз қонун мавжуд. Агар кимдир ичкилик таъсирида жиноят содир этса ва у олдиндан бундай ниятда бўлмаса, суд жазони енгиллаштиради. Масалан, бир фуқаро жамоат жойида ичкилик таъсирида одамларга ўқ узган. Судда унинг бу ҳолати “алкоголизмга чалинган бемор” сифатида баҳоланиб, жазодан озод этилган.
Миссури штатидаги Сент-Луис шаҳрида эса тўйгунча ароқ ичиш мумкин, аммо тротуарда ўтириб челакда пиво ичсангиз, жазоланасиз.
Тоғаймурод Шомуродов тайёрлади.
