Дунё воқеалари қисқа сатрларда: Қозоғистоннинг асосий авиакомпанияси жаримага тортилди. Европанинг уч давлати Киевга ёрдам беришни тўхтатмоқчи
🔻 Туркия президенти Ражаб Тоййиб Эрдўғон Исроил бош вазири Бинямин Нетаняҳуни Халқаро жиноий судда суд қилиш кераклигини айтди. Аввалроқ Эрдўғон Нетаняҳу тез орада "лаш-луш"ини йиғиштириб, мамлакатни тарк этишини истисно этмаган эди.
🔻 Исроил мудофаа кучлари бир неча миномётдан отилган снарядларга жавобан Ливанни ўққа тутган.
🔻 Таҳлилчилар прогнози: 2030 йилга келиб Россияда кадрлар танқислиги 2-4 миллион кишига етиши мумкин. На иш ҳақини ошириш, на муҳожирларни жалб қилиш муаммони ҳал қилишга ёрдам бермайди. Энг катта камомад ўрта касб-ҳунар ва олий маълумотли шахслар орасида бўлади.
🔻 Олма-ота шаҳри суди Air Astana авиакомпаниясини монопол мавқеини суиистеъмол қилгани учун 876 миллион тенге (1 миллион 800 минг доллар) миқдорида жаримага тортди. Авиакомпания чипталар нархига ёнилғи учун қўшимча ҳақни асоссиз равишда киритган. Ҳозирда авиакомпаниянинг 51 фоиз улуши Қозоғистоннинг “Самрук-Казына” жамғармасига, 49 фоизи эса Британиянинг BAE Systems компанияси шўъба корхонасига тегишли.
🔻 Индонезиядаги "Мерапи" вулқони отилиши натижасида 11 сайёҳ ҳалок бўлди. Яна камида 12 киши бедарак йўқолган.
🔻 Уч мамлакат Украинага молиявий ёрдам беришдан бош тортишни кўриб чиқмоқда: Венгрия, Нидерландия ва Швеция. Бундай режалар Венгрия Бош вазири Виктор Орбан ва Голландия Озодлик партияси раҳбари Геерт Вилдерс томонидан ишлаб чиқилаётгани айтилмоқда. Шунингдек, Киевни Европа Иттифоқига аъзо бўлиш имкониятидан маҳрум қилиш ғояси ҳам муҳокама қилинмоқда.
🔻 БАА сув танқислигини бартараф этиш учун 150 миллион доллар ажратади. Бу ҳақда БМТнинг иқлим ўзгариши бўйича доиравий конвенцияси (CОP28) иштирокчиларининг 28-конференцияси раислигида маълум қилинган.
🔻 Парагвай депутати самолёт ҳалокатида ҳалок бўлди. Мамлакат шарқида кичик самолёт қулаши оқибатида яна уч киши ҳалок бўлган.
🔻 Эйфел минораси яқинидаги Гренель қирғоғи ҳудудида бир киши пичоқ ва болға билан йўловчиларга ҳужум қилган, натижада немис сайёҳи ҳалок бўлган. Ҳужумчи полиция томонидан қўлга олинмагунча, у яна икки кишини яралашга улгурган.
🔻 Қўшма Штатлар Россиянинг Украинада ғалаба қозонишига йўл қўймаслик мақсадида Киевни ҳарбий ресурслар билан таъминлашни давом эттиришга тайёр. Бу ҳақда Пентагон раҳбари Ллойд Остин Калифорнияда миллий мудофаа бўйича Рейган форумидаги чиқишида маълум қилди. У Россия-Украина урушини НАТО иттифоқчиларига чақирув ва "қоидаларга асосланган халқаро тартибга тўғридан-тўғри ҳужум" деб атади.
🔻 Нью-Йорк Comex биржасидаги савдо маълумотларига кўра, олтиннинг нархи тарихда биринчи марта унция учун 2100 доллардан ошди.
