Эъзозлар, ишончлар учун ташаккур
- Аҳоли билан учрашувларда, аёллар билан суҳбатларда уларнинг дилидаги кўп истакларни, асрорларни эшитиб қоламиз. Яқинда бир аёл ёнимга келиб: «Президентимиз кўнглимиз тубидаги орзуларни қандай билди экан-а, ахир уй олиш бизга неча йиллардан бери армон бўлиб келаётганди-ку. Шу кўнгил кечинмаларимни бир шеър қилинг, опа”, – деди. Оҳ, менинг кўнгли оппоқ сингилгинам-а!
Халқаро хотин-қизлар куни арафасида давлатимиз раҳбарининг табригини ўша ердаги юзлаб аёллар қаторида чексиз ҳаяжон ва ғурур билан тингладик. Менинг орзуларимни давлатимиз раҳбари қаердан билди экан, деган аёлнинг қиёфаси кўз ўнгимда жонланди. Ҳа, шижоат, ғайрат ила олиб борилаётган ислоҳотлардан, аввало, мамлакатимизнинг оддий фуқаролари, бекалари баҳраманд бўлаётир. Президентимиз бу фикрга алоҳида урғу бердилар. Бу ишлар бардавом бўлажагини таъкидладилар. Аёлга эътибор, ғамхўрлик шунча бўлар-да, дейман.
Кўнглим тоғлар каби юксалиб кетар,
Бир оддий аёлга шунча бахт, ғурур.
Шу кунгача қанча жарлардан ўтдим,
Эъзозлар, ишончлар учун ташаккур.
Матлуба ТУРДИЕВА, II даражали «Соғлом авлод учун» ордени соҳибаси:
- Самарқанд шаҳридаги 2-сон оилавий поликлиникада “Соғлом бола” хонаси ташкил этилган. Поликлиникада тиббий кўрикдан ўтаётган она фарзандини шу хонада қолдириб, шифокорга учраши мумкин. Ёш оналар мактабида ҳомиладор аёллар ойда икки марта малакали шифокорлардан сабоқ олади, зарур жисмоний машқларни бажаради, оналик масъулияти хусусида суҳбатлар олиб борилади. Етти ўринли жой ҳам аёлларнинг гинекология бўйича стационар даволаниши учун ташкил этилган. Эмлаш хонасидаги шароитлар замонавий, лабораториядаги сўнгги асбоблар туфайли аҳоли 34 хил таҳлилни шу ернинг ўзида олиш имконига эга. Оддий поликлиникада аёллар учун шунча шароитнинг яратилгани хотин-қизлар учун юксак эътибордир. Президентимиз байрам муносабати билан хотин-қизларга йўллаган табригини эшитар эканман, бундай эътибор кейинги йилларда янада кучайишини ҳис қилдим.
