Ҳақиқат, меҳрибонлик ва фойда элаги ҳақида эшитганмисиз?

Бир киши Суқротнинг олдига келиб гап бошлабди:

-  Биласанми  дўстинг сен ҳақингда менга нима деди?

- Тўхта, шошмай тур, – дея Суқрот уни тўхтатди. - Айтмоқчи бўлганингни олдин уч элакдан ўтказиб ол.

- Қанақа элак?

- Бирон бир гапни бировга айтишдан олдин уни уч марта элакдан ўтказишга ҳаракат қилгин. Биринчи бўлиб, Ҳақиқат элагидан ўтказиб ол. Айтмоқчи бўлган нарсанг рост эканлигига аминмисан?

- Йўқ, мен фақат эшитдимки...

- Яъни, бу ҳақиқат ёки йўқлигини аниқ айта олмайсан. Иккинчи элак бу Меҳрибонлик элаги. Дўстим ҳақида яхши гап айтмоқчимисан?

- Йўқ. Бундай эмас...

- Ажойиб. Сен рост ёки ёлғонлигини ҳам билмай туриб дўстим ҳақида ёмон гап айтишни хоҳлаяпсан. Унда сўзларингни учинчи - Фойда элагидан ўтказиб ол. Менга айтмоқчи бўлган нарсаларингни ҳақиқатан ҳам билишим керакми?

- Йўқ... Асло йўқ.

- Демак, бу гапларда на Меҳрибонлик, на Ҳақиқат ва на Фойда бор экан. Айтгинчи, керак бўлмаган нарсалар ҳақида сўзлаш зарурмикан? Яхшиси айтмай қўя қол, - дебди Суқрот.

Баҳора МУҲАММАДИЕВА тайёрлади.