Имконияти чекланганлар учун унутилмас зиёрат
Кеча Самарқанд шаҳрида истиқомат қилувчи бир гуруҳ ҳамшаҳарларимиз учун Тошкент шаҳрига маънавий-маърифий ва сайёҳлик саёҳати ташкил этилди. Мазкур ташаббус имконияти чекланган фуқароларнинг маданий мерос объектлари, тарихий қадамжолар ва замонавий иншоотлар билан яқиндан танишиши, уларнинг бўш вақтларини мазмунли ташкил этиш ҳамда жамият ҳаётидаги фаоллигини ошириш мақсадида амалга оширилди.
Қайд этиш лозим, жорий йилнинг май ойида Кўзи ожизлар жамияти Самарқанд шаҳар бўлими томонидан шаҳар ҳокими номига мурожаат йўлланиб, жамият аъзоларидан иборат бир гуруҳ фуқароларнинг Тошкент шаҳрининг диққатга сазовор масканларини зиёрат қилиши учун амалий ёрдам кўрсатиш сўралган эди. Мурожаатда имконияти чекланган инсонларнинг мамлакатимиз пойтахтида амалга оширилаётган кенг кўламли бунёдкорлик ишлари, маданий-маърифий марказлар ва тарихий обидалар билан танишиш истаги билдирилган.
Мурожаатда кўтарилган масалани ижобий ҳал этиш мақсадида Самарқанд шаҳар ҳокимлиги томонидан тегишли ташкилотлар билан ҳамкорликда махсус дастур ишлаб чиқилди. Натижада 8 июнь куни Самарқанд шаҳрида яшовчи 50 нафар имконияти чекланган шахснинг Тошкент шаҳрига саёҳати ташкиллаштирилди.
Саёҳат иштирокчилари орасида кўп йиллардан буён пойтахтга бормаганлар ҳам, илк бор Тошкентни кўриш истагида бўлганлар ҳам бор эди.
Тошкент шаҳрига етиб келган меҳмонлар учун бой ва мазмунли дастур тайёрланган бўлиб, улар мамлакатимизнинг тарихий, маданий ва маънавий ҳаётида муҳим ўрин тутадиган қатор масканларга ташриф буюрдилар. Саёҳат давомида иштирокчиларга малакали гидлар ҳамроҳлик қилди. Улар ҳар бир объектнинг тарихи, аҳамияти ва ўзига хос жиҳатлари ҳақида батафсил маълумот бериб бордилар.
Айниқса, саёҳат иштирокчиларининг Ўзбекистон Ислом цивилизацияси марказига қилган ташрифи уларда чуқур таассурот қолдирди. Мамлакатимизда ислом маданияти ва маърифати тарихи, буюк алломаларимизнинг бой илмий меросини кенг тарғиб қилиш мақсадида барпо этилган мазкур марказ ҳақида берилган маълумотлар меҳмонларда катта қизиқиш уйғотди.
Малакали гидлар томонидан марказнинг фаолияти, унинг асосий мақсад ва вазифалари, шунингдек, бу ерда жамланган ноёб қўлёзмалар, тарихий манбалар ва экспонатлар ҳақида қизиқарли маълумотлар тақдим этилди. Иштирокчилар ўзбек халқи ва Марказий Осиё заминидан етишиб чиққан буюк мутафаккирлар, муҳаддислар, уламолар ва давлат арбобларининг жаҳон цивилизацияси ривожига қўшган улкан ҳиссаси ҳақидаги маълумотларни катта қизиқиш билан тингладилар.
Саёҳат қатнашчиларидан айримлари бу каби масканларга ташриф буюриш улар учун нафақат маданий ҳордиқ, балки маънавий озуқа ҳам бўлаётганини таъкидлади. Уларнинг фикрича, мамлакатимизда инсон қадрини улуғлаш, аҳолининг ижтимоий ҳимояга муҳтож қатламларига кўмак бериш ва улар учун муносиб шароитлар яратиш борасида амалга оширилаётган ишлар ана шундай тадбирларда янада яққол намоён бўлади.
Ташриф давомида иштирокчилар пойтахтда амалга оширилаётган кенг кўламли қурилиш ва ободонлаштириш ишлари, янги барпо этилган замонавий иншоотлар ҳамда аҳоли учун яратилган қулайликлар билан ҳам яқиндан танишиш имконига эга бўлдилар. Бу эса уларнинг мамлакатимиз тараққиёти, юртимизда кечаётган янгиланиш жараёнлари ҳақидаги тасаввурларини янада бойитди.
Саёҳатнинг ҳар бир манзилида иштирокчилар учун қулай муҳит яратилиб, уларнинг эҳтиёжлари инобатга олинди. Бу эса тадбирнинг юқори савияда ташкил этилганини кўрсатди.
Кўзи ожизлар жамияти Самарқанд шаҳар бўлими вакилларининг таъкидлашича, бундай тадбирлар имконияти чекланган инсонларнинг ижтимоий фаоллигини ошириш, уларни жамият ҳаётига кенг жалб этиш ва маданий-маърифий дунёқарашини бойитишда муҳим аҳамият касб этади.
Саёҳат иштирокчилари кўтаринки кайфият, ёрқин таассурот ва унутилмас хотиралар билан Самарқандга қайтди. Улар Тошкент шаҳрида кўрган-кечирганлари, эшитган қизиқарли маълумотлари ва олган таассуротларини яқинлари билан баҳам кўриш ниятида эканликларини билдирди.
