Киевда 40 миллион долларлик молиявий пирамида фош қилинди
Тезкор операция мобайнида 55 ёшли Россия фуқароси қўлга олинган.
Маълум бўлишича, у раҳбарлик қилган ташкилот 2017 йилда Россияда ташкил этилган ва кейинчалик фаолиятини бошқа давлатлар, жумладан, Украинага кўчирган.
"Фирибгарлар потенциал инвесторларга гўёки жаҳон миқёсидаги етакчи технология компаниялари акцияларига маблағ киритишни таклиф қилишган ва қисқа вақт ичида катта фойда олишига ваъда беришган. Шунингдек, лойиҳага янги инвесторлар жалб қилинган тақдирда, мижозларни «бонуслар» билан рағбатлантирган.
Бироқ у аслида нотижорат лойиҳа сифатида яратилган ва жиноий схемадан олинган маблағлар молиявий пирамида ташкилотчилари ўртасида тақсимланган", дейилади полиция тарқатган хабарда.
Хабарга кўра, схема ташкилотчиларининг даромади қарийб 40 миллион АҚШ долларини ташкил қилган. Терговчилар Киевдаги офисда ва унга алоқадор шахсларнинг манзилларида ўтказилган тинтувлар натижаларига кўра, «фойдали муассаса»нинг компьютер техникаси, мобил телефонлари, қоралама ёзувлари ва ташвиқот маҳсулотларини олиб қўйишган.
