Коррупцияга қарши энг катта куч шаффофлик ва адолатдир
Ўзбекистон Республикаси Президенти 5 март куни Коррупцияга қарши курашиш миллий кенгаши йиғилишида коррупцияни олдини олиш, шаффофликни таъминлаш ва давлат бошқарувида адолат мезонларини мустаҳкамлаш бўйича қатор муҳим ташаббуслар илгари сурди.
Биз, депутатлар йиғилиш давомида билдирилган таклифларни муҳим деб баҳолаб, коррупцияга қарши курашиш борасида қонунчиликни янада кучайтириш зарурлигини англадик. Шу билан бирга, жамоатчилик назоратини кучайтириш ва фуқароларни коррупцияга қарши курашга фаол жалб этиш ҳам муҳим ҳисобланади.
Йиғилишда Президент коррупцияни мамлакат тараққиётига энг катта тўсиқ сифатида баҳолаб, унга қарши курашиш давлат сиёсатининг устувор йўналишларидан бири эканини таъкидлади. Яъни, бунинг учун Коррупцияга оид қонунчилик такомиллаштирилиб, жавобгарликни кучайтириш бўйича янги таклифлар билдириш, давлат идораларининг фаолияти янада очиқ бўлиши, мансабдор шахсларнинг даромад ва харажатлари устидан назорат кучайтирилиши лозимлиги таъкидланди.
Бугунги кунда мактабгача ва мактаб таълими тизимида 10 дан ортиқ хизмат турлари тўлиқ электрон шаклга ўтказилди. Олий таълим тизими ҳам рақамлаштирилди. Шунингдек, аҳоли ва тадбиркорларга “халқ хизматидаги давлат” тамойили асосида хизмат кўрсатиш йўлга қўйилди. Буларнинг барчаси коррупцияга қарши курашда ижобий самара бермоқда дея оламиз.
Коррупция ҳар қандай жамият тараққиётига жиддий тўсқинлик қилувчи омиллардан биридир. Ушбу йиғилишда қабул қилинган қарорлар нафақат давлат органлари, балки бутун жамият олдига муҳим вазифаларни қўймоқда. Айниқса, биздепутатлар зиммасига юклатилган масъулиятниянада оширди.
Депутатлар жамиятнинг энг муҳим вакиллари сифатида коррупцияга қарши курашда фаол иштирок этишлари шарт. Яъни, халқ билан бевосита мулоқот қилиш орқали фуқароларнинг мурожаатларини кўриб чиқиши ва коррупцион ҳолатлар юз берган тақдирда у ҳақида ахборот олиши керак.
Президентимиз бошчилигида ўтказилган йиғилиш коррупцияга қарши курашда янги босқичнинг бошланиши бўлди. Депутатлар ушбу жараёнда етакчи роль ўйнаши, қонунийлик ва шаффофлик тамойилларини тарғиб қилиши лозим.
Агар коррупциясиз жамият қурмоқчи бўлсак, қонунийликни ҳурмат қилиш ва унга риоя қилиш ҳаммамиз учун устувор вазифа бўлиши керак. Биз депутатлар эса бу борада жамиятга намуналиетакчи бўлишимиз лозим.
Акмал Мирзоев,
халқ депутатлари Тойлоқ туман кенгаши депутати.
