Минскда Алишер Навоий ҳайкали очилди

Беларусь ва Ўзбекистон минтақалари биринчи форуми вақтида Минскда буюк мутафаккир ва шоир Алишер Навоий ҳайкали очилди.  Бу ҳақда «БЕЛТА» хабар бермоқда.

Тадбирда Ўзбекистон Олий Мажлиси Сенати раисининг биринчи ўринбосари Содиқ Сафоев, Беларусь Сенати раисининг ўринбосари Марианна Шеткина ва бошқалар иштирок этди.

Содиқ Сафоев ўзбек халқининг буюк ўғлонига биродар Беларусь республикаси пойтахтида ўрнатилган ҳайкал очилиш маросимида қатнашиши катта шараф эканини алоҳида таъкидлади. Шунингдек, буюк аждодга ва ўзбек халқи маданиятига кўрсатилган ҳурмат ва эътибор учун ўзбек халқи номидан Беларусь президенти, мэрияси ва Минск жамоатчилигига миннатдорлик билдирди.

Ёдгорлик беларуслик ёш ҳайкалтарош Максим Макаревич эскизи асосида яратилган.