Муаллим таърифида

(Биринчи ўқитувчим - меҳнат фахрийси Ҳамид ака Ориповга)

Дунёга тож эрур устозлар абад,

Сизга шогирд эрур ҳар қандай олим.

Тахтлар талош бўлган пайтларда минбаъд -

Шаҳзодалар суйган Сизни, муаллим!

Камалак тусида тарих турланар,

Муаррихлар шон, деб битгайдир доим.

Сиз айтгансиз: баланд учар турналар -

Зиё сочганга қанот бермиш Худойим.

Лаҳза сайин олам товланар ажаб,

Уруғ ерга тушса - униши маълум.

Не-не лаҳзалардан умрлар асраб -

Дунёга тиккансиз кўзни, муаллим!

Ҳаёт Сиздек бошим силайди девдим,

Лоқайдлигим сабаб эзилгай дилим.

Мен чала ўқибман, дангаса эдим,

Мен кечроқ очибман кўзни, муаллим!

Кимдир отга минган, кимдир пиёда -

Пойгада югурар давру давронлар.

Иқболи баланддир, толе зиёда -

Устозидан дуо олган ёронлар!

Отам, онам каби меҳрибоним - Сиз,

Шайтонлар сабоғи бездирди кўнглим.

Кўкка тикилсам гар, Сиз осмонимсиз -

Тик бўл, деб суяйсиз бизни муаллим!

Сиздан ўрнак бизга юриш-туришлар,

Оқ кўйлак кий, деган сариштамдирсиз.

Ватанни шеър демас ватанфурушлар -

Сиз шеърни ҳидлатган фариштамдирсиз!

Сеҳргар атасам, фаҳмим етмагай,

Сиз сабаб ғурурга тўладир дилим.

Авлиё десам гар ҳақим кетмагай -

Сиздан олдим ВАТАН сўзин муаллим!

 Баҳриддин САДРИДДИНОВ,

Навоий шаҳри.