На ободонлаштириш, на бошқа тегишли ташкилот ва на маҳалла аҳли Слава амакичалик бўлолмайдиган кўринади
![](https://static.zarnews.uz/crop/c/e/720__80_ce44aaddba8a9a4e7fc3c190e369bb08.jpg?img=self&v=1716549844)
Самарқанд шаҳридаги Улуғ Турсунов кўчасининг бир томонига қарасангиз, баҳри дилингиз очилади. Дарахт-у гуллар экилиб, чаманга айлантирилган. Энг қизиғи, бундай ободликни шу кўчада, Кўксарой маҳалласида яшовчи 80 ёшли Слава амаки бир ўзи амалга оширган. Қачон қарасангиз, гул кўчат кўтарган, дарахтларини парвариш қилаётган бўлади.
Аммо шу кўчанинг бу томонида мана бир неча йилдирки, чиқинди аримайди. Чиқиндини бегона эмас, шу маҳаллада яшовчилар ташлашади. Бу ҳақда ёзишдан, мутасаддилар у ердаги чиқиндини олиб кетишдан чарчади, тўғриси. Аммо аҳвол ҳеч ўзгармайди. Чиқинди ташиш машиналари бу кўчага келади, аммо одамлар ўша машинага эмас, айнан кўча бўйига чиқинди чиқариб ташлайди.
Қизиқ, 80 ёшида икки букилиб, атрофини обод қилаётган Слава амакидан ҳам уялмасмикан бу маҳалла аҳли?!
Маҳалладаги чиқинди ташлаётганлар ўз йўлига, тегишли ташкилотларнинг шаҳарнинг қоқ марказидаги муаммога ечим топа олмаётгани ғалати. Бу кўчага чиқинди контейнери қўйиш керак. Агарда бу мумкин бўлмаса, чиқинди ташиш машиналари доимий келиб турадиган бўлса, марҳамат, кўчанинг шу жойига камера қўйишсин. Токи, кўчага чиқинди ташлашдан қайтмайдиганларни жарима бир-икки “чақса” бу кўча ҳам қўланса ҳидидан қутулиб қолар.