Нурободлик 28 ёшли аёлни шаҳвоний мақсадлар учун сотмоқчи бўлганлар қўлга олинди
23 май куни Самарқанд вилояти ИИБ терроризм ва экстремизмга қарши кураш бошқармаси ва давлат хавфсизлиги хизмати ходимлари томонидан одам савдосига қарши кураш бўйича тезкор тадбир ўтказилди.
Самарқанд шаҳар Спитаменшох кўчасида яшовчи, 1983 йилда туғилган М.Н. ва 1988 йилда туғилган К.Б. Нуробод тумани Улус маҳалласида яшовчи, 28 ёшли Б.Б. ни, шаҳвоний мақсадларда фойдаланиш учун Туркия давлатига юбормоқчи бўлиб, тадбир иштирокчиларидан 800 АҚШ доллари миқдоридаги пулларни олиб, унинг фуқаролик паспортини сотган вақтида қўлга олинган.
Самарқанд вилояти ИИБ ахборот хизмати хабарига кўра, мазкур ҳолат юзасидан Жиноят кодексининг 135-моддаси (Одам савдоси) 2-қисми билан жиноят иши қўзғатилиб, тергов ҳаракатлари олиб борилмоқда.
