Ўзбекистонлик тиббиёт ходимлари маҳорати Сингапурда эътироф этилди
4-8 ноябрь кунлари Сингапурда бўлиб ўтган 21-Бутунжаҳон эндоскопик жарроҳлик конгресси (WCEС-2025)да мамлакатимиз вакиллари ҳам иштирок этди.
WCEС-2025 минимал инвазив ва роботлаштирилган жарроҳлик соҳасидаги энг йирик ва энг муҳим глобал форумлардан бири бўлиб, 70 дан ортиқ мамлакатдан етакчи мутахассисларни бирлаштиради.
Тадбир Осиё эндоскопик ва лапароскопик жарроҳлар ассоциацияси (ELSA) ва Эндоскопик жарроҳлар жамиятлари халқаро федерацияси (IFSES) томонидан ташкил этилди.
Бу галги конгресснинг асосий мавзуси эндолапароскопик жарроҳликда инқилоб – жарроҳликнинг замонавий келажагини шакллантирувчи динамик ўзгаришлар ва инновациялар бўлди.
Анжуман доирасида 80 дан ортиқ илмий сессиялар, 11 та маҳорат сабоқлари, инновацион технологиялар кўргазмаси ва “MIS Championship 2025” лапароскопик маҳорат мусобақаси ўтказилди.
– Мазкур халқаро форумда мамлакатимизнинг Тошкент, Самарқанд, Бухоро ва бошқа ҳудудларидаги етакчи тиббий марказларнинг 50 нафарга яқин малакали тиббиёт ходимлари иштирок этиши Ўзбекистонда эндоскопик жарроҳлик фаол ривожланиб бораётганининг яна бир ёрқин далили бўлди, – дейди Самарқанд давлат тиббиёт университети ихтисослашган болалар хирургияси маркази директори, профессор Жамшид Шамсиев. – Бу мамлакатимизда соғлиқни сақлаш соҳасини модернизация қилишга оид давлат дастурлари ҳамда Ўзбекистон Республикаси Президентининг илғор технологияларни жорий этиш ва тиббий ёрдам сифатини оширишга қаратилган фармон ва қарорлари самарасидир. Бизнинг марказимиз ходимлари конгрес сессияларида болалар эндоскопик жарроҳлик амалиётига замонавий ёндашувлар бўйича саккизта илмий маъруза тақдим этди ва барча маърузаларимиз иштирокчилар томонидан катта қизиқиш билан қабул қилинди. Хусусан, болаларда лапароскопик жигар эхинококкектомияси, шошилинч лапароскопик жарроҳлик амалиётлари, қизилўнгач кимёвий куйишларини даволашнинг замонавий жарроҳлик ёндашувлари бўйича тажрибаларимизни хорижлик ҳамкасбларимиз эътироф этди. Биз Ўзбекистоннинг жаҳон тиббиётида ўзини ишончли намоён этаётгани, профессионаллик, инновацион фикрлаш ва мукаммалликка содиқлигини намойиш этаётганидан фахрланамиз.
Дарвоқе, профессор Жамшид Шамсиев конгресснинг “Педиатрияда минимал инвазив жарроҳлик ютуқлари” шуъбасига раислик қилди ва буни олимнинг унинг соҳани ривожлантиришга қўшган ҳиссасининг муносиб эътирофи дейиш мумкин. Унинг раҳбарлигида 2017 йилдан буён нафақат Ўзбекистон, балки Марказий Осиё мамлакатларидан 274 нафар Осиё эндоскопик ва лапароскопик жарроҳлар ассоциацияси аъзолари ўзаро ҳамкорликни йўлга қўйди. Бунинг натижасида Марказий Осиё эндоскопик жарроҳлик бўйича жадал ривожланаётган минтақалардан бирига айланди.
Эътиборли жиҳати, мамлакатимиз вакиллари “MIS Championship 2025” лапароскопик маҳорат мусобақасида юқори даражадаги амалий кўникма ва тайёргарлигини намойиш этиб, учинчи ўринни эгаллади.
Конгресс қатнашчиларининг таъкидлашича, Ўзбекистоннинг “WCEС- 2025”даги иштироки нафақат тажриба алмашиш, балки мамлакатимиз тиббиётида инновацияларни кенг жорий этиш учун кучли туртки бўлди.
