O`zLiDeP фаоллари “SXF SAMARQAND SITI STROY” фаолияти билан танишди
Бугунги кунда Самарқанд шаҳрида фаолият юритаётган “SXF SAMARQAND SITI STROY” масъулияти чекланган жамияти томонидан Samarkand city ҳудудида замонавий меҳмонхоналар, амфитеатр, боулинг-клублар, караоке-барлар, кафе, ресторанлар, эсдалик совғалари ва бошқа маҳсулотлар дўконлари, кўп тармоқли тиббиёт марказлари, корхона ва ташкилотлар учун офислар ҳамда кўп қаватли аҳоли турар жойлари бунёд этилмоқда.
O`zLiDeP Самарқанд вилояти кенгаши аъзолари ушбу иншоотларнинг қурилиш ва лойиҳа жараёнлари билан танишди. Таъкидлаш лозимки, Samarkand city мажмуасининг умумий майдони 13 гектарни ташкил қилади. Қурилиш ишларига 350 дан ортиқ қурувчи жалб этилган. Партия фаолларига МЧЖ раҳбари Хуршид Тўраев ҳамроҳ бўлиб, ҳудудда амалга оширилаётган лойиҳаларни намойиш этди.
- Бугунги кунда юртимизда тадбиркорларга кенг имкониятлар яратиб берилган, – дейди Х.Тўраев. - Мен ҳам бу имконият ва имтиёзлардан оқилона фойдаланиб, юртимиз равнақига муносиб ҳисса қўшишни бурчим деб биламан. Олдимизга улкан режаларни қўйганмиз. Бу лойиҳаларни амалга ошириш орқали кўплаб иш ўринларини ташкил қилиш, аҳолига қулайликлар яратиш, Самарқанд шаҳрининг туризм салоҳиятини юксалтиришни ўз олдимизга мақсад қилиб қўйганмиз.
Ўз навбатида O`zLiDeP фаоллари партия дастурий мақсад ва вазифалари юзасидан “SXF SAMARQAND SITI STROY” МЧЖ ишчи ходимларига тарғибот ишлари олиб борди. Натижада 100 га яқин ишчи ходимлар партия сафига кириш истагини билдирди.
Жаҳонгир Хўжамкулов.
