Самарқанд ҳарбий суди учун қурилаётган янги бинода камчиликлар аниқланди
Вилоят ҳудудий Қурилиш ва уй-жой коммунал хўжалиги назорати инспекцияси томонидан ҳудудларда қурилиш ишларининг сифатини назорат қилишга қаратилган ўрганишлар изчил давом эттирилмоқда.
Навбатдаги назорат тадбири Самарқанд шаҳридаги «Ватанпарвар» маҳалласида Самарқанд ҳарбий суди учун қурилаётган янги бино иншоотида ўтказилди.
Ўрганишлар давомида буюртмачи ташкилотнинг техник назорати, лойиҳачи ташкилотнинг муаллифлик назорати ҳамда қурилиш ташкилотининг ички назорати ўз вақтида олиб борилмагани оқибатида бир қатор камчиликларга йўл қўйилгани аниқланди.
Жумладан:
➡️ Қоровулхона биноси эшик ва деразаларининг ён қисмларидаги темир-бетон ўзаклар лойиҳадан четга чиққан ҳолда 80–100 миллиметр кенгликда бажарилган.
➡️ Бинонинг ички деворлари учун ўрнатилган металл ўзаклардаги хомутлар оралиғи ҳам лойиҳа талабларига мувофиқ эмас. Уларнинг қадами 1200 миллиметр қилиб бажарилган, хомутлар учун эса 50 миллиметр ўлчамдаги металл листлардан фойдаланилган.
➡️ Шунингдек, ички деворлар терими орасига ўрнатилаётган тўрлар лойиҳада белгиланган тартибда маҳкамланмаган.
➡️ Муҳандислик тармоқларини ўрнатишда ҳам камчиликлар кузатилган. Жумладан, ичимлик суви тармоғи учун ўрнатилган темир-бетон қудуқлар орасига Н детали ўрнатилмаган. Полиэтилен қувурлар эса остки қисмига сариқ қум тўшалмасдан ўрнатилган.
➡️ Бундан ташқари, қурилиш иштирокчилари томонидан nazorat.mc.uz тизими орқали назорат ишлари олиб борилмагани аниқланди.
Аниқланган камчиликларни бартараф этиш мақсадида қурилиш иштирокчиларига бажарилиши мажбурий бўлган ёзма кўрсатмалар берилди. Уларнинг ижроси инспекция томонидан назоратга олинди.
