"Самарқанд - Тошкент" тезюрар темир йўли қатнов вақти 1,5 соатгача қисқаради

Ҳозирги йўналишларда асосий тўсиқ — юк поездлари сабаб ўтказиш қобилияти чекланганлиги. Шунинг учун қурилиши режалаштирилаётган янги магистрал мавжуд темир йўл тармоқларидаги юкламани камайтиради. 

Янги тезюрар йўл Тошкентнинг янги халқаро аэропортидан ҳам ўтади ва Самарқанд шаҳрининг марказигача келиши режалаштирилган.

Бу борада Жанубий Кореянинг "Saman Engineering" компанияси лойиҳанинг учта вариантини таклиф қилган:

1-вариант — 282 километр. Поезд ўртача 185,7 км/соат тезликда 1 соат 26 дақиқада етади. Йўналишда 74 та кўприк ва 8,9 километр умумий узунликка эга 3 та тоннел назарда тутилган.

2-вариант — 291,7 километр. Саёҳат вақти 1 соат 33 дақиқагача, ўртача тезлик 179,4 км/соатгача. Лойиҳа 82 та кўприк ва 16 километрли битта тоннелни ўз ичига олади.

3-вариант — энг узун йўл: 302 километрдан ортиқ. Ўртача 166,9 км/соат тезликда қатнов 1 соат 45 дақиқа давом этади. Йўналишда 105 та кўприк ва жами 9,6 километрлик 2 та тоннел қурилиши кўзда тутилган.