Сарпо машинаси миллий қадриятларимизга мос келадими?

Кейинги пайтда Самарқанд шаҳрида пештоқига «сарпо машинаси», деб ёзиб қўйилган ва юкхонаси тўрт тарафлама ойнаванд машиналар ҳаракатлана бошлади.

Ушбу машиналар турмуш қураётган келин-куёвларнинг сарполарини тегишли манзилларга етказиб бериш билан шуғулланади. Албатта, яхшигина хизмат ҳақи эвазига!

Бу хизмат келин бўлмишлар хонадонидан фотиҳа тўйи бўлиши мўлжалланган ресторан ёки тўйхонагача келиннинг сарполарини (кейинги пайтда куёв бўлмишнинг кийим-кечаги ҳам қўшилган) олиб бориш ҳамда қайтариб келишдан иборат.

«Сарпо машинаси» келин (куёв) бўлмишга аталган сарпо кийимларини юклаб олиб, маҳалла кўчасининг бошидан охиригача товуш чиқарувчи сигналларни босгани ҳолда паст тезликда юриб ўтади. Бу билан «сарпо машинаси»даги буюм ва кийим-кечак қўни-қўшнига кўз-кўз қилинади ҳамда маърака манзилига етказилади. Фотиҳа тўйи тугагач, яна маҳалла аҳли назарини қаратган ҳолда белгиланган хонадонга олиб борилади.

Бу «янги одат» халқимизнинг миллий қадриятларига мос келармикан? Албатта, йўқ. Чунки асрлар мобайнида шаклланган миллий-маънавий қадриятларимиз, урф-одатларимиз ва анъаналаримизда бундай келин сарпосини кўз-кўз қилиш ҳамда келин кийимлари билан элга мақтаниш удуми бўлмаган. Аксинча, момоларимизу оналаримиз келин сарполарини «кўз тегиб қолади», дея сандиққа жойлаб, ёмон ниятли кишиларнинг назари тушишидан асраган.

Бугун эса келин сарполарини (ҳатто ички кийимларини ҳам) маҳалладошлар ва қавму қариндошларга мақтаб кўрсатиш одатга айланиб бормоқда. Бу «одат» тўй қилаётган оилалар бюджетига ҳам зарар етказмоқда.

Шундай экан, маҳаллалар фаоллари келин сарпосини «сарпо машинаси»да кўз-кўз қилишнинг олдини олишлари керак.

Йўлдош Суюнов.