Тажрибали ва кекса ҳунармандларнинг маҳсулотлари кўпчиликда қизиқиш уйғотди

4-10 октябрь кунлари республикамиз бўйича ўтказилаётган “Кексалар ҳафталиги” тадбирининг галдагиси Самарқанд шаҳридаги "Хазора" маҳалла фуқаролар йиғини марказида ташкил этилди.

“Ҳунарманд” уюшмаси Самарқанд вилоят бошқармаси ташаббуси билан “Уста-шогирд анъанаси - амалда” мавзусида ўтказилган тадбирда нуронийлар, ёши улуғ ва ёш ҳунармандлар, “Нуроний” жамғармаси аъзолари иштирок этди.

- Бу ҳафталикнинг ташкил этилиши биз, кексаларга бўлган чексиз ҳурмат ифодаси, - дейди Ўзбекистон халқ устаси Холмаҳмат Исматиллаев. – Уй шароитида ўндан зиёд шогирдимга кулолчилик буюмлари ясаш сирларини ўргатяпман. Уйда бўлсак-да ўзимиз ҳам, ёшлар ҳам ишли, озми-кўпми даромад қиляпмиз.

Тадбир давомида тажрибали ва кекса ҳунармандларнинг маҳсулотлари намойиш этилди. Қўлда меҳр ва қалб қўри билан ясалган ҳунарманчилик буюмлари кўпчиликда қизиқиш уйғотди.

Муҳаммад Ҳайдаров.