Тўйнинг қоидалари “тўйчи”нинг ихтиёридан чиқиб кетяпти
Аввалроқ сайтимизда “Тўйнинг низомини ким ёзади?” сарлавҳали мақола эълон қилинган эди. Мақолага муносабатлар ичида Пахтачи туманида яшовчи меҳнат фахрийси Жўрақул Нарзуллаевнинг мулоҳазалари эътиборимизни тортди. Муаллиф таҳририятга юборган хатида ўзи ўтказган битта тўйдаги санаб адоғига етиб бўлмайдиган янги одатлар ҳақда сўз юритган.
“Фармон Тошевнинг ушбу мавзудаги мулоҳазаларини ўқиб, бир “тўйчи” сифатида ўз бошимдан кечирганларимни ёзишга қарор қилдим.
Эзгу ният билан бошлаган тўйимизни ҳам ўтказиб олдик. Эрта тонгда уйғониб, бутун тўй давомида югур-югурлар билан ўзим ҳеч нарса емаганимни эслаб турган эдимки дарвоза тақиллаб қолди. Ташқарига чиқсам, бир бегона йигитча, қўлида бир даста суратлар ушлаб турибди. Кеча, мен кимлардир билан тушган эканман, энди пулини тўлаб суратларни олишим керак эмиш. Кекса одамман тўйда ичганим йўқ, аммо кимлар мени ва меҳмонларни суратган олганини қандай назорат қилардим. Қолаверса, ҳозир ҳаммада телефон, ўзимизникилар кераклича суратга олишган бўлса, бу йигитни ким чақирган экан.. Начора, тахминан 200 минг сўмча тўлаб, расмларни олдим. Суратларга қизиқмадим ҳам.
Ана шундан кейин дарвоза тақиллатишлар давом этди. «Фата»чи қизлар, “Видео”чи, куёв-келиннинг столига “чодир” қўрганлар, тўйхона ташқарисида осмонга “салют” отганлар, “салат”чи опалар... хуллас, кўпчилик келиб кетди. Мен тобора ёқа ушлайман, ўғлим эса пинагини ҳам бузмайди. Аксинча, “Дада, ҳали “кортежчи”ларга ҳам тўлашимиз керак, кўп эмас, бир ярим миллионгина” дейди.
Яхшиямки кеча “музикант”лари, “карнай-сурнайчи”лари, давракаши, “келин саломчи”лари, тўйхона ички йўлагини безовчилари, яна қанақадир “дизайн”чиларини “расшет” қилган эканман. Бўлмаса улар ҳам дарвозам олдида бўлишарди.
Ҳа майли, тўй ўтди. Пул бор экан тўладим, озми кўпми қарз бўлса, узарман. Бироқ, юқоридаги мақолада сўз борганидек тўйларимизга “пуллик хизмат” тури шунчалик кўпайиб кетгани ва ҳали ҳам кўпаяётгани мени ҳайрон қолдирди. Уларни ким ўйлаб топмоқда?
Ўйлаб қоламан, бу ўзим ўтказган тўйдаги расм-русуму янгиликларнинг ярмидан ҳам хабарим йўқ. Ростанам, тўйнинг “Низоми”ни ким белгилаяпти? Мен тўйчи бўлсаму мени рухсатимсиз, мени хоҳишимсиз нега бошқалар тўйга эгалик қилаяпти?
Тўй сўнгида осмонга “пақа-пақ” салют отгувчиларга бало борми? Тўғри, улар ҳам ўз-ўзидан келишмайди. Бир "бойвачча" ўз тўйига шу нарсани ташкил қилган. Бўлди, "қовун қовундан ранг олади"деганларидек ёшларимизга бу "юқади".
Журналист мулоҳазасида таъкидланганидек тўйхоналарни қўштирноқ ичидаги тадбиркорлар босиб олди. Улар назаримда тўй эгалари биланмас, ресторан хўжайинлари билан келишса керак, яна ким билсин”.
Жўрақул Нарзуллаев, меҳнат фахрийси.
