Ургутликлар рафиқасига гул совға қилмайдими? Пахтачиликларчи?

Ёки гул дўконларидаги «об-ҳаво» ҳақида

Март келиши билан гул дўконлари гавжумлашиб қолишини кўпчилик билади. Шунинг учун бўлса керак, бу кунларда гул дўконидаги гулларнинг нархи ҳам қаҳратон қишдаги нархдан анча баландроқ бўлади. Самарқанд шаҳридаги гул дўконларини бугун айланиб, қуйидагиларни аниқладик. У ерда бир дона атиргул  15 минг сўмдан 20 минг сўмгача, чиннигул (гвоздика) 5 минг сўм, дасторгул 10 минг сўм. Ўртача гулдасталарнинг нархи эса 50 минг сўмни ташкил қилади. 150, 200 минг сўмлик гулдасталарнинг олдида уни олишни истамайсизу, аммо чўнтакка қараб иш кўрган одам доим ютади. Қолаверса, аёллар совғага бир дона гул олса ҳам кўзлари чақнаб хурсанд бўлишади. Ахир файласуфлар, таъкидлаганидек, эътиборнинг ўзи совға.

Туманларда ҳам гулларнинг нархи ўртача шу миқдорни ташкил этади. Аммо барча туманларда ҳам гул дўконининг мавжуд эмаслиги кишини ўйга толдиради. Мисол учун яқинда Қўшработ туманидаги бир танишимга қўнғироқ қилганимда корхонасидаги хотин-қизларга гул олиш учун Челак ё Иштихонга бориб келишга мажбур эканлигини айтиб қолди. Пахтачиликлар эса рафиқасига гул олиш учун Навоий вилоятига қатнайди. Аҳолиси туманлар ичида энг кўп ҳисобланган Ургут туманида яшовчи кишилар гул сотиб олмоқчи бўлса Самарқанд шаҳрига келиб кетишга мажбур.

Баъзи туманларда гул дўкони бир эмас, бир нечта экан. Мисол учун Паст Дарғом туманида нақ тўртта гул дўкони фаолият юритиб, таъби нозик харидорга ҳам ўзига маъқул бўлган гулдаста тайёрлаб беришлари мумкин. Фақат пулини тўласа бас. Бу ердаги гулларнинг нархи Самарқанд шаҳридаги нархлар билан деярли бир хил. Баъзи туманларда эса фақат байрам, қолаверса, мавсум пайти бозорлар ёнида вақтинча гуллар сотуви йўлга қўйилган экан.

Хуллас, бу соҳа тадбиркор ўйлаб кўриши учун яхши имконият. Эҳтимол қайсидир тумандаги гул дўкони сизники бўлиши мумкиндир. Шошилинг!

Гулҳаё АСАТУЛЛАЕВА.