Ёшликни маънавият билан, илм билан, меҳнат ва эзгу мақсадлар билан безаш ҳар бир ёшнинг масъулиятидир
30 июнь — Ёшлар куни мамлакатимиздаги ҳар бир ёш қалб эгаси учун эътибор, эътироф ва маънавий қувонч кунидир.
Президентимиз ташаббуси билан ҳар йили айнан шу санада ёшларимизнинг орзу-умидлари, иқтидори ва салоҳиятини қўллаб-қувватлашга қаратилган кенг кўламли ислоҳотлар ҳаётга татбиқ этилмоқда.
Диний соҳада ҳам бугунги кунда юртимиздаги ёш авлоднинг маънавий камолоти, соф эътиқодли ва Ватанга садоқатли этиб тарбиялаш, уларни турли ёт ғоялардан асраш масалаларига катта эътибор қаратилмоқда. Чунки ёш авлод қандай тарбияланса, келажак шу руҳда шаклланади.
Расулуллоҳ соллаллоҳу алайҳи васаллам марҳамат қиладилар:
«Ёшлик – Аллоҳ томонидан берилган қимматли неъматдир. Аммо уни олти нарса барбод қилади: Роббисини ёддан чиқариш, ҳаётни абадий деб ўйлаш, нафс иллатларига берилиш, иродасизлик, бахиллик ва манфаатпараст орзулар билан яшаш» (Имом Ғаззолий ривояти асосида).
Ҳақиқатан ҳам, ёшлик инсон ҳаётидаги энг ноёб ва ажойиб фаслдир. Бу фаслда инсон ўзининг ақлий, жисмоний ва руҳий жиҳатдан энг баркамол чоғини бошдан кечиради. Ана шундай даврни маънавият билан, илм билан, меҳнат ва эзгу мақсадлар билан безаш эса ҳар бир ёшнинг масъулиятидир.
Бугун юртимизда ёшлар учун барча эшиклари кенг очиқ. Масжидларимиз фақат ибодат маскани эмас, балки маънавий тарбия ва илм-маърифат даргоҳига айланган. Аниқ айтиш жоизки, ҳар қандай тараққиётнинг илдизи илм ва ахлоқ, ислоҳ ва маърифатдадир. Зеро, илмли, идрокли, ҳақиқий қадриятларга таянган ёшларгина юрт келажагини ёруғ қилиб, жамиятга нур улашади.
Аллоҳ таоло Қуръони Каримда шундай деб марҳамат қилади:
"Аллоҳ сизлардан иймон келтирганлар ва илм берилганларни даражаларга кўтарур" (Мужодала сураси, 11-оят).
Ҳақиқий иймон эгаси бўлган, илм ва ҳикматга интиладиган, юртига хизмат қилувчи ёш — Исломда ҳам, жамиятда ҳам энг улуғ мақомга эга шахс саналади.
Бугунги кунда шукр билан айтишимиз керакки, ёшларимиз орасида илм эгаллаш, халқига манфаатли бўлиш, ота-она розилигини топиш, Ислом ахлоқига амал қилишга интилиш кучаймоқда. Бу эса халқимизда диний-маънавий юксалишнинг, ёшларда масъулият туйғусининг ортганидан дарак беради.
Айнан шу боис, ҳозирги кунда ҳар бир имом-хатиб, устозлар ва барча соҳадаги масъулларимиз ёшларга эътиборли бўлиши, уларни тинглаши, йўл кўрсатиши, ҳақиқий динни чуқур ўргатиши зарур.
Ёшларга мана шундай раҳнамолик — энг улуғ ибодатлардан биридир. Чунки бир ёшнинг тўғри йўлни топиши — келажакда бутун бир оиланинг, маҳалланинг, балки миллатнинг фойдасига хизмат қилади.
Шу ўринда буюк аждодларимизнинг ҳаёти ҳам ёшларга улкан ибратдир. Имом Бухорий, Имом Мотурудий, Маҳдум Аъзам каби алломалар айнан ёшлик пайтларида илм йўлига кириб, бутун ислом оламига зиё нурини тарқатганлар.
Хулоса қилиб айтганда, ёшлар биз учун имтиҳон эмас, балки имкониятдир.
Ислом динида ёшлик қадрли, халқимизда эса ёшларга нисбатан эъзоз ва эътибор азалдан катта бўлган. Бугун ана шу эътиборни илм, меҳнат ва хулқ билан оқлаш эса ҳар бир ёшнинг муқаддас бурчи ҳисобланади.
Аллоҳ таоло юртимиз ёшларини соф иймон, тўғри эътиқод, яхши амал ва илм билан юксалтирсин. Келажагимиз — илмли, ибодатли, ватанпарвар ёшлар қўлида обод бўлсин.
Аҳмадхон домла Алимов,
вилоят бош имом-хатиби.
