1 апрель ҳазили бўлмасин-да: Трамп АҚШ яқинда урушни якунлаб, Эрондан чиқиб кетишини маълум қилди

Унинг сўзларига кўра, Вашингтон аллақачон «режим ўзгаришига эришган», ҳозир эса ҳукуматда «анча камроқ радикал кучлар» турибди.

Шу билан бирга, Трамп асосий мақсад ҳам бажарилганини таъкидлаб, Эрон энди ҳеч қачон ядровий қуролга эга бўла олмайди, деди.
Бугун Оқ уй матбуот котиби Кэролайн Левитт маълум қилишича, Дональд Трамп халққа мурожаат билан чиқади. Таффсилотлар очиқланмаган, аммо бу баёнот Трампнинг операция яқин ҳафталарда якунланиши мумкинлиги ҳақидаги сўзларидан кейин янгради.

АҚШ ва Исроилнинг Эронга қарши уруши бир ойдан ортиқ давом этмоқда. Минтақага америкалик ҳарбийлар юборилган, аммо ер усти операцияси ҳали бошланмаган. Сўнгги кунларда Трамп АҚШ ҳарбий ҳаракатларни якунлашга яқин эканини бир неча бор таъкидлаган.

Ҳурмўз бўғози, урушдан олдин денгиз орқали нефть экспортининг тахминан бешдан бир қисми ўтадиган йўл, ҳозирча ёпиқлигича қолмоқда. The Wall Street Journal маълумотига кўра, март охирида Трамп ёрдамчиларига, ҳатто Ҳурмўз бўғози орқали кема ҳаракати тикланмаса ҳам, АҚШнинг Эронга қарши ҳарбий кампаниясини якунлашга тайёр эканини билдирган.