150 долларлик маҳорат сабоқларини бепул ўтаётган аёл
Хизмат кўрсатиш соҳасида фаолият кўрсатаётган аксарият тадбиркорларнинг ижтимоий тармоқларда ўз саҳифалари бор ва follower, яъни кузатувчиларининг изоҳ ва баҳолари орқали уларнинг рейтинги ошади ё пасаяди.
Шунинг учун ижтимоий тармоқда ўз фаолиятини мунтазам ёритиб бориш ҳақиқий рақобатни келтириб чиқаради ҳамда ўзига ишонган хизмат кўрсатиш соҳаси вакилларигина унда ўз саҳифасига эга бўлишга жазм этади.
Яқинда самарқандлик шундай тадбиркор кузатувчилари билан онлайн эмас, юзма-юз учрашиб, маҳорат машғулоти ўтди. Ушбу учрашувда иштирок этарканмиз, ҳайратланарли жиҳатлар кўп бўлди. Аввало, маҳорат дарсига 200 га яқин одамнинг йиғилгани бўлса, улар орасида Фарғонадан, Бухоро, Қашқадарёгача, республикамизнинг қарийб барча вилоятларидан иштирокчиларнинг борлиги эди.
Тадбиркор бу каби маҳорат машғулотларини ҳар йили бир маротаба бепул ўтказиб турар ва бундай дарсларининг бугунги “бозор” нархи 150 АҚШ доллари атрофида эмиш. Қизғин маҳорат сабоқлари жараёнида иштирокчиларни саволга тутиш осон бўлмади.
Танаффус пайтда уларнинг баъзилари билан гаплашиб олдик.
- Қўшработ туманидан келганман, бир неча йилдан бери шу соҳада фаолият юритамиз, - дейди Ҳусния Мамарасулова. – Зармитан маҳалласида жойлашган гўзаллик салонимизда хотин-қизларга хизмат кўрсатамиз. Ҳеч кимга оғирлигим тушмайди, яқинда опамга ҳам касбимни ўргатдим. Бир ой давомида камида 10-15 миллион сўм маблағ топамиз. Бугун маҳорат машғулотларини ўтаётган Ҳанифа Саломованинг ишларини инстаграм орқали мунтазам кузатиб борамиз ва улардан онлайн тарзда ҳам жуда кўп янгиликларни ўрганамиз. Опанинг ишлари бизга масофадан туриб малака оширишдай бўлади. Ҳар йили мана шундай жонли машғулот ўташларини кутиб юрамиз, тўғриси. Чунки бу дарсларда у киши ҳеч нарсани яширмайди, соҳанинг энг майда сир-асрорларигача ўргатади. Кўпчилик бундай қилмайди.
- Жиззахнинг Зафаробод туманидан келганман, ўн йилдан бери салонда ишлайман, - дейди Умида Бобомуродова. – Бугун мижозлар кундан-кун янгича турмак ва юз бўянишларини талаб қилади. Ёки интернет орқали кузатиб бораётган салонлардаги каби янгича соч бўяшни сўрашади. Бу хизматлар эса биз учун янгилик бўлиб, уни ўрганишга қўшимча пул сарфлашимиз лозим. Яхши биласиз, туманларда гўзаллик салонидаги хизмат ҳақлари шаҳар марказидаги каби қиммат эмас. Шунинг учун ҳар сафар соҳадаги янгиликларни ўрганиш учун бир неча миллион сўм маблағ сарфлай олмаймиз. Ҳанифа опанинг маҳорат сабоқлари биз учун айни муддао бўлади. Бир кун давомида ҳамкасблар билан гаплашиб, тажриба алмашиб кетамиз.
Бепул маҳорат машғулоти билан бирга узоқдан келган кузатувчиларига самарқандча меҳмондўстлик кўрсатиб, тушлик ҳам ташкил қилган тадбиркор билан шу пайт оралиғида суҳбатлашиб олдик.
-30 йилдан бери шу соҳада фаолият юритаман, - дейди тадбиркор Ҳанифа Саломова. – 17 йилдан бери ўзим алоҳида салон юритаман, 20 га яқин хизмат турларини кўрсатамиз. Ҳар йили 30-35 нафар шогирд чиқарсам, уларнинг камида беш нафарига, яъни ижтимоий ҳимояга муҳтож аёлларга касбимни бепул ўргатаман. Аёл кишининг ҳунарли бўлиши ҳаётда доим унга тиргак бўлган. Юзлаб шогирдларим бугун ўз салонига эга. Савоб умидида бир неча йилдан бери хотин-қизларга бепул маҳорат дарслари ўтиб келаман. Шу ҳунари орқали рўзғорини тебратиб, фарзандларини ёлғиз улғайтираётган аёлларни кўриб, бу қилаётган ишимни доимий тадбирга айлантирдим.
Бугун бу ҳунарни ўрганиш учун хотин-қизлар 7-8 миллион сўм атрофида маблағ сарфлашади.
Инстаграмда 130 мингга яқин кузатувчиси бор тадбиркор аёл одамларга балиқ эмас, қармоқ тарқатаётгандай туюлди менга.
Гулруҳ Комилова.
