АҚШ Беларусга нисбатан қўшимча санкциялар жорий этилиши ҳақида огоҳлантирди

“Вашингтон Минскка нисбатан янги санкциялар жорий этиш эҳтимолини кўриб чиқмоқда”, деб маълум қилди АҚШ давлат котиби Майк Помпео Беларусь мухолифати мувофиқлаштириш кенгаши аъзоси Мария Колесникованинг ҳибсга олинганига изоҳ бериб.

“Шерикларимиз ва иттифоқдошларимиз билан келишган ҳолда Беларусда инсон ҳуқуқлари бузилиши ва репрессияларда иштирок этганларни жавобгарликка тортишни таъминлаш учун АҚШ қўшимча мақсадли санкциялар жорий этилишини кўриб чиқмоқда”, дейилган унинг ёзма мурожаатида.

Шу билан бирга АҚШ давлат котиби Колесникованинг ўғирланганлиги ва уни мувофиқлаштириш кенгашининг бошқа аъзолари билан бирга мажбурлаб, Украина ҳудудига ўтказиб юбормоқчи бўлишгани тўғрисидаги хабарлардан хавотирда эканини маълум қилди.