Булунғурда темир йўл кесишмасидаги тоннел фойдаланишга топширилди

Умумий узунлиги 862 метр бўлган йўл ўтказгич 2024-2025-йиллар мобайнида бунёд этилди. Иншоотнинг эстакада қисми узунлиги 33 метр, баландлиги 5,5 метр ва кенглиги 40 метрни ташкил этади. 

Йўл ўтказгич бўйлаб 46 та қуёш панелли ёритиш чироғи ўрнатилиб, 800 метрдан ортиқ масофада пиёдалар йўлаги қурилди. 

Тоннелнинг очилишига бағишланган тадбирда вилоят ҳокими вазифасини бажарувчи Адиз Бобоев, вилоят ва туман фаоллари, кенг жамоатчилик вакиллари иштирок этди. Адиз Бобоев тўпланганларни Мустақиллик байрами ва янги тоннел очилиши билан табриклади. 

- Умумий қиймати 80 миллиард сўм бўлган мазкур иншоот бугундан бошлаб халқимиз хизматига топширилмоқда. 

Биласиз, олдинлари бир кунда ўртача 48 марта поезд қатнови натижасида пиёдалар, автотранспорт воситалари ҳаракати умумий ҳисобда 7-8 соатга тўхтатилар эди. Бу албатта, транспорт воситалари орқали аҳоли қатнови, тез тиббий ёрдам ва бошқа фавқулодда вазиятлар юзага келганда муаммоларни келтириб чиқарган. Ушбу замонавий тоннелнинг қурилиб, фойдаланишга топширилиши халқимиз учун муносиб байрам туҳфаси бўлди,- деди Адиз Бобоев. 

Маълумот учун, тоннел қурилишига 80 миллиард сўм маблағ йўналтирилди. 

Тадбирда қурилиш ишларида фаоллик кўрсатган қурувчиларга вилоят ҳокимлигининг ташаккурнома ва совғалари топширилди.