Коррупцияга қарши курашишда журналистларнинг ўрни борми?
«… Туман тиббиёт бирлашмасига қарашли туғруқхона атрофида бешта дорихона бор. Қизиғи, мавжуд қонун-қоидаларга кўра, туғруқхоналарда барча тиббий хизматлар ва дори-дармонлар бепул. Журналистик суриштирувимиз эса бу дорихоналар фаолияти «гуллаб яшнаши»нинг сабабини ойдинлаштирди…». Бу гаплар ана шу семинарда машғулот тарзида ўтказилган журналистик суриштирувлардан биридан олинди. Худди шу тарзда маҳаллий ҳокимликлар ва таълим муассасаларида юз бериши мумкин бўлган коррупция ҳолатларига бағишлаб ҳам машғулотлар ўтказилди.
Таъкидланганидек, коррупцияга қарши курашишда журналистнинг ўрни нафақат бор, балки жуда муҳимдир. Бугунги кунда бутун дунёда бўлган каби мамлакатимизда ҳам коррупция ва бошқа иллатларга аввало, жамоатчилик қаршилиги ҳал қилувчи кучга айланиб бормоқда. Жамоатчилик фикри эса оммавий ахборот воситалари орқали шаклланади.
Семинар очиқ, ўзаро фикр алмашиш ва муҳокамалар тарзида ўтиб, ҳар бир иштирокчи коррупцияга қарши курашишда бажарилиши лозим деб билган таклифларни илгари сурди. Мисол учун, бир гуруҳ журналистлар ўз мақолаларида маълум бир муаммони ёритаркан, ҳар доим коррупциянинг турли кўринишларига ишора қилишини, шу орқали коррупцияга қарши жамоатчиликда муросасизлик кайфиятини уйғотишга ҳаракат қилишини билдирди. Бошқа журналистлар эса коррупция кўринишлари акс этган мақолалар баъзан акс-садосиз қолиб кетиши муаммосини биринчи навбатда ҳал этиш лозим бўлган масала деб ҳисоблайди.
– Ушу семинар Ўзбекистон Журналистларни қайта тайёрлаш маркази томонидан Буюк Британиянинг мамлакатимиздаги элчихонаси кўмагида ўтказилмоқда, - дейди шу марказ ходими Қобил Хидиров. – Семинарда коррупцияга қарши курашиш бўйича Европа мамлакатлари тажрибасини ўртоқлашдик. Шу билан бирга, самарқандлик журналистлар билан фикр алмашиб олдик.
Анвар МУСТАФОҚУЛОВ.
