Нефть арзонлашмоқда, Ўзбекистонда бензин нархи тушадими?

Ўтган ҳафта охирида брент типидаги нефть котировкалари 69 долларгача арзонлашган.

Йил бошидан нефть котировкалари ўртача 12 фоизга, ўтган йилнинг шу даврига нисбатан 23 фоизга пасайган. Шимолликларнинг Urals маркали нефти 2 йиллик минимумларда сотилмоқда (бизга асосан шу нефтдан бўлган бензин импорт қилинади).

Бутун дунёда нефть арзонлашганда нега бизда бензин арзонлашмайди, деган ҳақли сўров негадир Ўзбекистонда янграмайди. Иқтисодий қарор қабул қилувчиларнинг кун тартибида ҳам бу масала йўқ.

Балки ҳамма билади: Ёқилғи-энергетика тизимини тили ва чўнтаги бир олигархлар ва монополистлар эгаллаб олган. Эркин бозор ва истеъмолчига қарши барча сунъий ва маъмурий тўсиқлар қўйилган.

Сунъий дефицит ва қиммат ёқилғи орқали суғуриб олинаётгани рента аҳолининг тўлов қобилиятини пасайтираётгани, ички ва ташқи бозорда ўзбек товарларининг рақобатбардошлилигини ўлдираётгани туфайли йўқотишлар билан солиштирилмайди. Кимнингдир чўнтагига 100 миллион доллар тушиши учун Ўзбекистон иқтисодиётига неча миллиард доллар зиён келтирилаётгани ҳақида ўйлаш бошланган куни бу масалада ўзгаришлар бошланади.

Отабек Бакиров.