Оддий сабзининг оддий бўлмаган шифобахш хусусиятлари
Кўпчиликнинг уйида ҳар доим бир неча турдаги дори топилиши мумкин. Лекин агар оддийгина сабзи истеъмоли тўғри йўлга қўйилса, дори қути тез орада унутилиши ҳеч гапмас. Унинг ўрнини эса шарбат тайёрлагичга бўшатиб бераверинг. Агар турли дўконларда, ёки ошхонамизда қатор турган шарбатлар ичидан сабзи шарбати ҳам ўрин олганида, шубҳасиз кўчалардаги дорихоналар сони ҳам бугунгичалик кўп бўлмасди.
Кўпчилик учун бир вақтнинг ўзида 5 дона сабзи ёки 3 дона олмани ейиш қийиндир. Лекин бир пиёла сабзи ёки олма шарбатини ичиш ҳеч қандай қийинчилик туғдирмайди. Ундан ташқари, организмга озиқ-овқатлардан кўра, шарбатлардан кўпроқ витаминлар сўрилади.
Сабзи шарбати А провитамини ҳамда бета-каротин билан бойитилган. Улар мия томирларини мустаҳкамлаб марказий асаб тизимида қон айланишини яхшилайди.
150 мл. сабзи шарбати инсон териси, кўзлар ва иммунитет тизими саломатлиги учун бир кунлик эҳтиёжни қондиради. У суяк ва тишлар саломатлигини сақлашга ёрдам беради. Сабзидаги В дармондорилари эса асаб тизими фаолиятини яхшилаб, соч ва тирноқларнинг ўсиш жараёнини тартибга солади.
100 мл сабзи шарбатидаги C дармондориси кунлик миқдорининг 33 фоизи ва К витаминининг ярмини ўз ичига олади.
C дармондориси иммунитет тизими ва юрак-қон томир тизими учун фойдали бўлса К дармондориси қон ивишига ижобий таъсир кўрсатади ва калцийнинг танага сўрилиши ва метаболизмда ёрдам беради. Сабзи таркибидаги Е витамини терининг саломатлиги учун муҳим бўлиб, у А витамини сўрилишига ёрдам беради.
Янги сабзи шарбати узоқ муддатли оғир касалликдан турганлар, шунингдек, кексалар учун жуда зарурий ичимлик.
Аммо, овқат ҳазм қилиш билан боғлиқ муаммолар ҳамда гастрит ва панкреатит хуружларида сабзи шарбатидан фойдаланиш тавсия этилмайди.
Сабзи ичак микрофлорасини озиқлантиради, шарбати қон айланиш тизими учун фойдали, C витамини, калий ва магнийга бойлиги билан қон томирлари ва юрак мушакларини мустаҳкамлайди.
Сабзи шарбати 10 ойликдан катта ёшларда болаларнинг кўриш жараёнини, асаб тизими ва ичаклар соғлиғини яхшилайди.
Сабзи шарбати таркибидаги антиоксидант моддалар: C, А, Е витаминлари тери, тирноқлар ва сочлар гўзал ва соғломлиги учун жуда муҳим. Бу мазали ичимлик аёллар репродуктив тизимига ҳам ижобий таъсир кўрсатади. Сабзи шарбатидаги каротин аёллардаги гормонал жараённи тартибга солади ва бепуштлик эҳтимолини камайтиради.
Сабзи шарбати эркаклар репродуктив тизимига ижобий таъсир кўрсатади, қонда шакар миқдорини пасайишига ёрдам беради, холестерин чиқарилишини тезлаштиради.
